سەرۆكی كاتیی پەرلەمان رایدەگەیەنێت، لە دانیشتنی 18ی ئەم مانگەدا، سەرۆكایەتیی پەرلەمان دیاری دەكرێت. دەشڵێ، هیوادارن هەنگاوی خێراتر بۆ ئەو مەبەستە بنرێت، بۆ ئەوەی هەم پەرلەمان، هەمیش حكوومەت و سەرۆكایەتیی هەرێم بكەونە خزمەتی هاووڵاتیانەوە.

دوێنێ شاندی دانوستانكاری پارتی دیموكراتی كوردستان و یەكێتیی نیشتمانیی كوردستان بە سەرۆكایەتیی نێچیرڤان بارزانی، جێگری سەرۆكی پارتی و كۆسرەت رەسووڵ، جێگری سكرتێری گشتیی یەكێتی كۆ بوونەوە و، هەردوولا لەسەر چەند خاڵێك رێككەوتن و بەپێی ئەو رێككەوتنەیش رۆژی 18ی ئەم مانگە پەرلەمانی كوردستان كۆ دەبێتەوە.

رێڤینگ هرووری، سەرۆكی كاتیی پەرلەمان، بۆ ماڵپەڕی فەرمیی پارتی دیموكراتی كوردستان، گوتی: "پارتی و یەكێتی لەسەر چەند خاڵێك رێككەوتوون و بڕیار دراوە 18ی ئەم مانگە كۆبوونەوەی پەرلەمان بكرێت و سەرۆكایەتیی پەرلەمان دیاری بكرێت، بۆیە بۆ ئێمەی پەرلەمانتاران و خەڵكی كوردستان شتێكی زۆر دڵخۆشكەر بوو، چونكە ماوەیەكی زۆرە خەڵك چاوەڕێ دەكات دەستەی سەرۆكایەتی دیاری بكرێت و لیژنەكان دابنرێن و پەرلەمان دەست بە كاری خۆی بكات، هەروەها حكوومەت و سەرۆكایەتیی هەرێم پێك بهێنرێن، ئەوانەیش هەموو گرێ درابوون بە كۆبوونەوەی پارتی و یەكێتییەوە، بۆیە ئەوەی كە دوێنێ بڕیاری لێ درا، ئێمە وەك سەرۆكایەتیی كاتی پەرلەمان و پەرلەمانتاران پێشوازی لێ دەكەین و هیوادارین هەنگاوەكانی دواتر زووتر بنرێن، بۆ ئەوەی هەم پەرلەمان، هەمیش حكوومەت و سەرۆكایەتیی هەرێم بكەونە خزمەتی هاووڵاتیانەوە".

سەرۆكی كاتیی پەرلەمانی كوردستان دەشڵێ: "دەبێ لە دانیشتنی 18ی مانگدا سەرۆكایەتیی پەرلەمان یەكلا بكرێتەوە، چونكە كۆبوونەوەی پەرلەمان بە كراوەیی ماوەتەوە تا پەرلەمان دادەنیشێت، لەگەڵ دەستپێكردنی دانیشتنی پەرلەماندا، كۆبوونەوەكە بە كراوەیی نامێنێت و دەبێت دەستەی سەرۆكایەتیی پەرلەمان هەڵبژێردرێت، بەوەش پەرلەمان دەست بە كاری خۆی دەكات".
kdp-