نڤیسكارێ كورد د. ره‌شید فندى، د چوار قوناغاندا باس ل ژیانا سه‌ركرده‌یێ شه‌هید ئیدریس بارزانی دکەت و بۆ ماڵپه‌ڕی فه‌رمیی پارتی دیموكراتی كوردستان دبێژیت، ئێک ژ مەزنترین شەرێ دژی سوپایێ عیراقێ یێ زوزک و ھندرین سەرکەفتن ئینا کو نەھێلا دەڤەرا شۆرەشێ یا وی دەمی دناڤبەرا سوران و بادیناندا دابەش ببیت، ھەردیسان دناڤ پەنابەرێن کورد ل ئیرانێ رولێ بلندکرنا مورالا پەنابەران دگێرا، زێدەباری کو مەیدانی دناڤ نەخوشیێن واندابوو."

ل گۆڕه‌ی بۆچوونا فندی شكه‌ستنا هێرشا مه‌زن یا سوپایێ ئیراقێ ل گولانا 1966 ل سه‌ر ده‌ڤه‌را شۆره‌شێ ل بازنه‌یا ره‌واندز ، هه‌ردوو چیایێن زۆزك و هندرین بۆ رۆلێ ئیدریس بارزانی ڤه‌دگه‌ریت كو راسته‌ڕاست به‌شداری دگه‌ل پێشمه‌رگه‌ی دا ل وی شه‌ری دا كربوو، نه‌هێلا سوپایێ ئیراقێ ئارمانجا خوه‌ بده‌ستڤه‌ بینیت كو مه‌ره‌ما وێ ئه‌وبوو ده‌ڤه‌را شۆره‌شا ئیلۆلێ بكه‌ته‌ دوو پشك ژ چیایێ زۆزك و هندرین تا حاجی عومه‌ران بچیت و بڤی شێوه‌ی دخواستن دابه‌شكاریێ دناڤبه‌را ده‌ڤه‌رێن بادینان و سۆران دروست بكه‌ت.

فندی زێده‌تر دبێژیت: پشتی نێزیكی هه‌یڤه‌كێ ژ شه‌ری، پێشمه‌رگه‌ شیا سه‌ركه‌فتنێ ل سه‌ر سوپایێ ئیراقێ تۆمار بكه‌ت و حكوومه‌تا ئیراقێ یا وی سه‌رده‌می كو عەبدولرەحمان به‌زاز سه‌رۆكوه‌زیران بوو نه‌چار بوو ده‌ست ب دانوستاندنێ دگه‌ل سه‌ركرده‌یێن شۆره‌شێ بكه‌ت وسه‌ركه‌فتن د ڤی شه‌ری دا حكوومه‌تا ئیراقێ نه‌چار كر كو رێككه‌فتنا 29 خزیرانا 1966 د گه‌ل مه‌لا مسته‌فا بارزانی بكه‌ت و سێ به‌ندێن نه‌ئاشكرا ژی د وێ رێككه‌فتنێ دا هه‌بوون ئێك ژ وان پارێزگه‌هكرنا دهۆكێ بوو.

ئانكو داخوازا شۆره‌شا ئه‌یلولێ بوو دهۆك ببیته‌ پارێزگه‌ه و ئێك ژ ده‌ستكه‌فتێن وێ بوو.
ره‌شید فندى كو نڤیسه‌ر و بێژه‌رێ ده‌نگێ كوردستانێ بوو ل سه‌رده‌مێ شۆره‌شێ، به‌حسێ رۆلێ ئیدریس بارزانی د به‌یانا 11 ئادارا 1970 دا دكه‌ت و دبێژیت: نه‌ تنێ رۆل هه‌بوویه‌ د ئیمزاكرنا وێ به‌یاننامێدا، به‌لكو رۆل هه‌بوو د دووڤچوونا بجهئینانا به‌ندێن وێ رێككه‌فتنێ كو وێ به‌یاننامێ چه‌ندین ده‌ستكه‌فتی بۆ كوردان هه‌بوو.

ده‌ما حكوومه‌تا ئیراقێ و سه‌ركردایه‌تییا شۆره‌شێ ل سه‌ر ئۆتۆنۆمیێ بۆ كوردان لهه‌ڤهاتن كرین و نه‌هاتیه‌ بجهئینان دیسان ل بهارا 1974 ئیدریس بارزانی ب نوونه‌راتیا مه‌لا مسته‌فا بارزانی سه‌ره‌دانا به‌غدا كربوو و د گه‌ل به‌رپرسێن وی ده‌می كۆم بوو ژ وان ژی سه‌دام حوسێن، نڤیسكار فندى كو هه‌شت سالان جێگرێ سه‌رۆكێ ئه‌كادیمیا كوردى بوویه‌ دبێژیت، "سه‌دامی كاك ئیدریس ل گه‌ل خوه‌ بره‌ جهێن چه‌كێن گران و زریپۆشێن نوو یێن ژ رۆسیا كڕین نیشانی وی دان، ئه‌و یه‌ك ژی وه‌ك گه‌فه‌كێ یه‌ ژ ئالیێ سیاسی ڤه‌ كو هێزا خوه‌ یا سه‌ربازی بۆ دیاربكه‌ت، لێ ئیدریس بارزانی ب سه‌دامی راگه‌هاند ئه‌و هاتینه‌ به‌ندێن ئاسێ یێن بجهئینانا رێككه‌فتنێ به‌حس بكه‌ن و ئه‌و ژ زریپۆشێن وان نه‌ترسیاینه‌ و ناترسن، هه‌رچه‌نده‌ حكوومه‌تا ئیراقێ سۆزا مافێ ئۆتۆنۆمیێ ب كریار هه‌مبه‌ر كوردان بجهنه‌ئینا، لێ خویا دبیت كو ل داوی په‌یوه‌ندیێن شۆره‌ش و به‌غدا دا هه‌ر رۆلێ ئیدریس بارزانی هه‌بوو.
دكتۆر ره‌شید فندی كو نها سه‌رۆكێ جڤاتا ئاشتییا ناڤخۆیه‌ ل دهۆكێ، به‌حس ل رۆلێ ئیدریس بارزانی یێ په‌نابه‌ریێ ل ئیرانێ دكه‌ت كو به‌رده‌وام دناڤ په‌نابه‌رێن كوردستانا ئیراقێ ل ئیرانێ دگه‌ریا و گه‌له‌ك هاریكاری یا مرۆڤایه‌تی ل دووڤ شیانان پێشكێش دكرن و مورالا و‌ان بلند دكرن كو جاره‌ك دى دێ ڤه‌گه‌رن.

پرت و به‌لاڤییا د ناڤ پارتیێن كوردستانی یێن ل ئیرانێ وه‌كر كو ئیدریس بارزانی بیر ل دامه‌زراندنا به‌ره‌یه‌كێ كوردستانی بكه‌ت، دا هه‌می پارتی ل بن ئێك سیوان دا كۆم ببن و شه‌رێ چه‌كداری د ناڤ وان دا روونه‌ده‌ت، ده‌رئه‌نجام شیا ل 1986 به‌ره‌یی كوردستانی بدامه‌زرینیت ئه‌و ژی بۆ هیمه‌ت و زیره‌كا وی ڤه‌دگه‌ریت.

فندى دبێژیت: ب بۆچوونا من ئه‌گه‌ر یێ ساخ بایه‌ ژی دا به‌رده‌وامی ب وی به‌ره‌ی هێت دان ژبه‌ركو هه‌رده‌م رۆلێ وی یێ ئاشتیخوازانه‌ بوو و په‌یوه‌ندیێن به‌غدا و كوردان ژی نه‌دگه‌هشتنه‌ ئاسته‌كێ هه‌ری خراب.
KDP-