نووسینگەی جێگری یەکەمی سکرتێری گشتیی یەکێتیی نیشتمانیی کوردستان ڕوونکردنەوەیەکی لەسەر پەلاماردانی پزیشکێکی سلێمانی لەلایەن چەند چەکدارێکی یەکێتی بڵاو کردەوە و ئاشکرای کرد کە سکاڵا لە دژی پزیشکەکە تۆمار دەکەن.

بەپێی ئەو ڕوونکردنەوەیە کە ئەمڕۆ دووشەممە ٢١ی ١ی ٢٠١٩ بڵاو کراو ئاماژە بەوە دراوە، چەند ڕۆژێکە ڕووداوی دەمەقاڵێیەکی دکتۆر بەختیار ئەمین و چەند پێشمەرگەیەکی یەکێتی لەسەر شەقام بۆتە قسەوباسی گەرمی ھەندێک کەناڵی ڕاگەیاندنی چەند لایەنێکی سیاسی کە نووسینگەکە ئەو ڕووداوە بە ”بابەتێکی ئاسایی و سادەیە“ وەسف دەکات و ئاماژەی داوە کە دەکرێ یاسا ڕۆڵی خۆی لە چارەسەرکردنیدا بگێڕێت و سەرپێچکار سزای خۆی وەربگرێت.

نووسینگەکەی کۆسرەت ڕەسوڵ ڕەخنەی لە دکتۆر بەختیار ئەمین گرتووە و ڕای گەیاندووە:“بەبێ ھۆ دەستی داوەتە ھەڵمەتێکی تەشھیر و بوختانکردن لەسەر کۆسرەت ڕەسول و کوڕەکانی، لە کاتێکدا کە بەڕێزیان دوور و نزیک ھیچ پەیوەندییان نە بە بابەتەکە و نە بەلایەنی شەڕەکەوە نییە، تەنھا ئەوە نەبێت کە کۆسرەت ڕەسوڵ وەک جێگری سکرتێری گشتیی (ی.ن.ک)، بەرپرسی ھێزی پێشمەرگەی یەکێتییە“.

ئەوەش ڕوون کراوەتەوە: ”ناکرێت لە ھەر جێیەکی ئەم کوردستانە بەرینە پێشمەرگەیەک لە دەرەوەی ئەرکی فەرمیی خۆی تووشی دەمەقاڵی و کێشەی لابەلا ببێت، جێگری سکرتێری گشتی لێی بەرپرسیار بێت“.

لە کۆتاییدا باس لەوە کراوە: ”وەک نووسینگەی کۆسرەت ڕەسووڵ ھەموو ڕێکارێکی یاسایی دەگرینە بەر بۆ خستنەڕووی ڕاستییەکان بۆ ڕای گشتی و کۆتایی ھێنان بەو ھەڵمەتە چەواشەکارییانە و داوای یاسایی لەسەر لایەنی بەرامبەر تۆمار دەکات و بۆ لێپێچینەوە و گرتنەبەری ئیجرائاتی یاسایی لەگەڵ لایەنی بەرامبەر“.

بەهۆی ئەوەی کەیسی هاوردەکردنی دەرمانی ئێکسپایەری بەرپرسێکی باڵای ئاشکرا کردووە، بەرپرسەکە چەکدارەکانی ناردووەتە سەری و تەقەیان لێی کردووە. لە چەند میدیایەکیش باس لەوە کرابوو کە ئەو بەرپرسە کۆسرەت ڕەسووڵ عەلییە.













باسنيوز