گوتەبێژی پۆلیسی سلێمانی لە پرێس کۆنفرانسێکدا زانیاریی نوێ لەبارەی دۆسیەی سێوان قادر و ھەروەھا ئاماری ساڵی ٢٠١٩ دەخاتەڕوو.

نەقیب سەرکەوت ئەحمەد، گوتەبێژی پۆلیسی سلێمانی لەو پرێس کۆنفرانسەدا ئاماژەی بەوە کرد: ”ھەموو ئەو ھەواڵانەی کە باس لەوە دەکەن، سێوان قادر خۆی و منداڵەکانی سوتاندووە، ھیچ پشتڕاستکردنەوەکی پۆلیسی بۆ نەکراوە، پۆلیسی سلێمانی زانیاری بە کەس نەداوە، ئێستا سەرجەم راپۆرتی پزیشکیی دادوەری و تیمەکانی ئاگر کوژێنەوە و تیمەکانی بەڵگەی تاوان، ھەموو لێکۆڵینەوەکانیان تەواو کردووە و خراوەتە بەردەم دادگا، دوا بڕیاریش لای دادگایە سەبارەت بەو دۆسیەیە".

بە گوتەی سەرکەوت ئەحمەد، پۆلیس و ئاسایشی سلێمانی بۆ پلانی ساڵی ٢٠١٩ کۆبوونەتەوە، پلانەکەش بۆ بەدواداچوونی ئەو کەسانەیە کە فەرمانی دەستگیرکردنیان هەیە. گوتیشی: ”ئەمڕۆ توانرا تۆمەتبارێک دەستگیر بکرێت کە لە ٢٠٠٩ بە کوشتنی کەسێک تۆمەتبارە، ھەروەھا تۆمەتبارێک ئۆتۆمبێڵێکی دزیبوو، توانرا دوای چەند کاتژمێرێک، دەستگیری بکەن، ھەروەھا لە ١/١/٢٠١٩ تا ١٢/١/٢٠١٩، بیست فەرمانی دەستگیرکردن جێبەجێ کراوە“.

سێوان قادر نزیکەی مانگێک لەمەوبەر لە ماڵەکەی خۆیدا لە چەمچەماڵ، بەهۆی ئاگرەوە بە ڕێژەی ٩٠٪ سووتا و دوو منداڵەکەشی گیانیان لەدەست دا، دواتر سێوان قادر گیانی لەدەست دا. پاشان هاوسەرەکەی بەهۆی ئەوەی تۆمەتبار کراوە، دەستگیر کرا و ئافرەتێکی دیکەش لە کەیسەکەدا دەستگیر کرا، بەڵام پاشان ئافرەتەکە ئازاد کرا.











باسنيوز