هەتا نۆكە عیراقێ نەفتا سپی ل شنگال دابەش نەكریە
مەحما خەلیل، قائیمقامێ قەزا شنگالێ، نها ل ناڤا سەنتەرێ شنگالێ و دەوروبەرێن وێ نێزیكی 52 هزار كەسان دژین و هێشتا ژی 350 هزار خەلكێ شنگالێ یێ ئاوارەیە و ل هەرێما كوردستانێ دژین. حكومەتا عیراقێ سۆز دابوو خەلكێ شنگالێ د ڤێ مەها 12 دا هەر خێزانەكێ ئەوێن ل شنگال دژین بەرمیلەكێ نەفتا سپی بۆ دابین بكن، بەلێ ئەڤە وەرزێ زڤستانێ نێزیكە دێ ب نیڤی ژی بیت و هێشتا عیراقێ نەفت بۆ وان دابین نەكریە.
مەحما ئەو یەك ژی دیار كر كو عیراق ب بەهانەیا هندێ كو ترۆمبێلێن ڤەگوهاستنێ نینن، لەوما نەفتا سپی بۆ خەلكێ شنگالێ فرێنەكریە، بەلێ یا پێدڤیە ب زووترین دەم نەفتا سپی بگەهیتە خەلكێ شنگالێ.
فەرحان شنگالی، چالاكڤانێ جڤاكی و سەرۆكێ رێكخراوا پرا گەنجان ل سەنتەرێ قەزا شنگالێ خەلكێ شنگالێ گەلەك یێ رەزیل بوویە و د سارمایێ دانە و خەلك ناچاربوویە رۆژانە لیترا نەفتا سپی ب 750 دیناران دكرن و هەر بەرمیلەكێ نەفتا سپی ب 160 هزار دینارانە و هێشتا چو نیشانێن دابەشكرنا نەفتا سپی ژلایێ عیراقێ ڤە نینە.
فەرحان ئاشكرا كر ژی كو عیراقێ كوپۆنێن نەفتا سپی یا ژمارە ئێك ل سەر خەلكێ شنگالێ دابەش كربوو و ئەو كۆپۆنە هاتە سۆتن ژی و خەلكی نەفتا سپی وەرنەگرت، بەری چەند رۆژان پلێتا ژمارە چوار ل سەر خەلكی دابەشكریە، بەلێ ئەڤجارە ژی عیراقێ هێشتا نەفتا سپی دابەش نەكریە.
باسنيوز
