سەرۆکی لیژنەی نەوت و گازی ئەنجومەنی پارێزگای کەرکووک گوتی، دزینی نەوتی کەرکووک بووەتە دیاردە و بەردەوامیش باسی دەستگیرکردنی باندی دزینی نەوت دەکرێت، بەڵام تەنیا بۆ ڕاگەیاندنە و تاوەکو ئێستا یەک کەس سزا نەدراوە و ناسنامەشی ئاشکرا نەکراوە، بۆیە ئەمە بە کەسانی ئاسایی ناکرێت و باندی گەورەی لەپشتە.

ھێزەکانی پۆلیسی فیدراڵی لە بەیاننامەیەکدا بڵاویان کردووەتەوە، جارێکی دیکە لە شاری کەرکووک ژمارەیەک کەس دەستگیر کراون، کە بۆڕیی نەوتی کەرکووکیان کون کردبوو و لە ڕێگەی سۆندەیەکی دوو ئینجییەوە نەوتیان دەدزی، ئەمەش جاری یەکەم نییە و چەندین جارە بۆڕیی نەوتی کەرکووک کون دەکرێت و نەوتی لێ دەدزرێت و ھێزەکانی پۆلیسیش بەردەوام باسی دەستگیرکردنی باندی دزینی نەوت دەکەن، بەڵام تا ئێستا ھیچ کەسێک ناسنامەی ئاشکرا نەکراوە.

سەرۆکی لیژنەی نەوت و گازی ئەنجومەنی پارێزگای کەرکووک، ئەحمەد عەسکەری، بە ماڵپەڕی فەرمیی پارتی دیموکراتی کوردستانی ڕاگەیاند: "ھۆکاری ئەو ھەموو دزینەی نەوتی کەرکووک بۆ ئەوە دەگەڕێتەوە کە ھێزەکان ناتوانن پارێزگاری لە بۆڕیی نەوت بکەن و ڕێگەش بە ھیچ ھێزێک نادەن بیپارێزێت، بۆیە دزینی نەوت بە شێوەیەکی بەرچاو زیادی کردووە و بووەتە دیاردە."

ئەحمەد عەسکەری گوتیشی: "ئەم کارە بە کەسانی ئاسایی ناکرێت و باندی گەورەی لەپشتەوە ھەیە، چونکە کونکردنی بۆڕی، پێویستی بە تیم ھەیە و شارەزاییی باشی دەوێت و دەبێ کەسانێکی باڵادەستیشی لەپشتەوە بێت و توانای باشیان ھەبێت."

عەسکەری ڕوونیشی کردەوە: "ھێزە ئەمنییەکان بەردەوام لە ڕاگەیاندندا باس لە دەستگیرکردنی باندی دزینی نەوت دەکەن و تاوەکو ئێستاش یەک کەس دادگایی نەکراوە و لێپێچینەوە لەگەڵ کەس نەکراوە، بۆیە دزیکردن زۆر بووە و ھەرکەسە و بە ئارەزووی خۆی دزی دەکات."
kdp-