ئەندامەکێ خولا بەرێ یێ ئەنجوومەنێ نوونەران ل عیراقێ راگەهاند، ئەگەر کورد بخوازن سەنگەکا بهێز ل بەغدا هەبیت، دڤێت کەسایەتیێن بهێز و بیرمەند بۆ پوستێن حکومى و سیاسى ب هەلبژێرن داکۆ سەنگا خو راگرن، کو تا نوکە چ سەرۆکێن کورد ل بەغدا نەهاتینە دانان داخوازا مافێن مللەتێ کورد بکەن و پرسگرێکا کوردا ئەقلیەتە نەک یا کەسانە.

پشتى هەلبژارتنێن ئەنجوومەنێ نوونەرێن عیراقێ هاتینە ئەنجامدا تا ئەڤرۆ حکومەتەکا نوو ل عیراقێ دروست نەبوویە و مافێن کوردا نەهاتینە دان، محسن عوسمان ئەندامێ خولا بەرێ یێ ئەنجوومەنێ نوونەران ل عیراقێ بۆ مالپەرێ فەرمیێ پارتى دیموکراتى کوردستان گۆت:" ل سالێن بیستان ل جەرخێ بەرێ تا ئەڤرۆ کورد گازندان ژ بەغدا دکەن ژبۆ نەدانا مافێن رەوا یێن کوردان و نوکە کوردستانى ب هەمى پێکهاتەڤە ڤێ گازندێ دکەن، بەلێ کورد بەحس ل نەئێکگرێزیێ ناکەن کۆ تا نوکە بدروستى نەشیاینە ل بەغدا پەیدا بکەن".

محسن عوسمان خویاکر:" تا نوکە چ سەرۆکێن کورد ل بەغدا نەهاتینە دانان داخوازا مافێن مللەتێ کورد بکەن و پرسگرێکا کوردا ئەقلیەتە نەک یا کەسانە، ژبەر هندێ بلا کورد ل هیڤیا بەغدا نەبیت کێشیێن ڤى مللەتلى جارە بکەت، بەلى گرنگە کوردا بەرنامە و پرۆژەیێن ئێکگرتى ل بەغدا هەبن".

ئەندامێ خولا بەرێ یێ ئەنجوومەنێ نوونەران ل عیراقێ زەلالکر:" ئەگەر کورد بخوازن سەنگەکا بهێز ل بەغدا هەبیت، دڤێت کەسایەتیێن بهێز و بیرمەند بۆ پوستەیێن حکومى و سیاسى ب هەلبژێرن داکۆ سەنگا خو راگرن، هەروەسا دڤێت سیاستمەدارێن کورد دەمێ شاندەکى رەوانەیى بەغدا دکەن ب رژدى پشتگرێن دیپلوماتێن کورد بن، کۆ بەرى شاند بجیتە بەغدا دگەل پەرلەمانتار و کونسل وەزیرێن کورد بروونن داکو پێزانێن باش ل بەردەستێ شاندى هەبن ".

محسن عوسمان ئاخفت:" دڤێ کابینێ دا گرنگە کورد ب بیرۆکا ئێکرێزیێ ل بەغدا هەبیت و شاشیێن خۆیێن سالێن بورى دگەل بەغدا دوبارە نەکەنە ڤە، کێشەیێن لایەنێن سیاسى ل نافخویا هەرێما کوردستانێ نەبنە بەغدا و دژى ئێک لوێرێ ب بکار بینن".
kdp-