پشتى بۆرینا حه‌فتیه‌كێ ل سه‌ر دیتنا زارۆیه‌كا كچ یا حه‌فت رۆژى ل قه‌زا شێخان، دادگه‌ها شێخان بریار دا زارۆك بۆ خانیێ ئێتیمان ل مووسل بهێته‌ ره‌وانه‌كرن.

پیر ئه‌ودى سلێمان، رێڤه‌به‌رێ تاقیگه‌ها نه‌خۆشخانا گشتى یا شێخان دیار كر، ئه‌ڤرۆ رۆژا چوارشه‌مبى 26/12/2018، دادگه‌ها شێخان بریار دا، ئه‌و زارۆكا حه‌فت رۆژى ئه‌وا به‌رى حه‌فتیه‌كێ ل شێخان ل به‌رده‌رگه‌هێ نه‌خۆشخانێ هاتیه‌ دیتن بۆ مووسل بهێته‌ ڤه‌گوهاستن، بۆ هندێ ل خانیێ ئێتیمان دا بژیت و بێخودان نه‌مینیت.

پیر ئه‌ودى ئاماژه‌ ب هندێ ژى دا كو هه‌ر ل ده‌مێ دیتنا وێ زارۆیا حه‌فت رۆژى و هه‌تا نها (12) خێزانێن قه‌زا شێخان خواست بوو وێ زارۆكێ بۆ خوه‌ ببه‌ن و ب خودان بكه‌ن و وه‌كو زارۆكێ خوه‌ چاڤێ خوه‌ بده‌نێ، به‌لێ دادگه‌ها شێخان ره‌تكر ئه‌ڤ زارۆكه‌ بچیته‌ دناڤا چو مالان دا، ب به‌هانه‌یا هندێ چو خێزانان به‌لگه‌نامه‌یێن دورست نه‌بووینه‌ بۆ ب خودانكرنا ڤێ كچێ.

ئاشكرا ژى كر كو ڤێ كچا حه‌فت رۆژى چو نه‌خۆش نینن و هێشتا چو ناڤ ژى ل سه‌ر نه‌هاتینه‌ دانان و ل گۆره‌ى بریارا دادوه‌رێ شێخان، ئه‌ڤ كچه‌ دێ ژیانا خوه‌ ل خانیێ ئێتیمان ل مووسل بورینیت و گۆتیشى: ژبه‌ر كو نه‌خۆشخانا شێخان سه‌ر ب مووسل ڤه‌یه‌، له‌وما ئه‌ڤ زارۆكه‌ بۆ مووسل هاته‌ ره‌وانه‌كرن.











باسنيوز