بەڕێوەبەرایەتیی پۆلیسی سلێمانی لە ڕاگەیاندراوێکدا ئاشکرای کرد، کەسێک لە سلێمانی دەستگیر کراوە، کە فێڵی لە خەڵکی کردووە و پارەی لێ وەرگرتوون.

ئەمڕۆ چوارشەممە 26/12/2018، بەڕێوەبەرایەتیی پۆلیسی سلێمانی ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ھاتووە: "بنکەی پۆلیسی ئیبراھیم ئەحمەد تۆمەتبارێکیان دەستگیر کرد، کە فێڵی لە ھاووڵاتییان کردووە و پارەی لێ وەرگرتوون، کە گوایە دایاندەمەزرێنێت و زەوییان بۆ وەردەگرێت، یان خانەنشینیان دەکات".

ھەر لە ڕاگەیاندراوەکەدا باس لەوەش کراوە: "ئێستا تۆمەتبار (م، م، ع) دانیشتووی شاری سلێمانییە و بە فەرمانی دادوەر و بەپێی مادەی 456 لەیاسای سزادانی عێراقی ڕاگیراوە".

پۆلیسی سلێمانی داوا لە ھاووڵاتییانی شارەکەی دەکات: "بەو جۆرە کەسانە ھەڵنەخەڵەتێن و لەکاتی بوونی ھەر ڕووداوێکی لەم شێوەیە، دەستبەجێ لایەنە پەیوەندیدارەکان و ھێزەکانی پۆلیسی لێ ئاگادار بکەنەوە".









باسنيوز