بە ھۆی تەقینەوەی ئۆتۆمبێلێکی بۆمبڕێژکراو لە تەلەعفەر ٢٠ کەس بوونە قوربانی، کە وەک راگەیاندرا چەکدار و لایەنگری حەشدی شەعبین.

حەسەن خەلۆ، بەرپرسی لیژنەی ناوچەی پارتی دیموکراتی کوردستان لە زوممار، بۆ ماڵپەڕی فەرمیی پارتی دیموکراتی کوردستانی ڕاگەیاند: "لە تەلەعفەر لە گەڕەکی ڕاس جادە، کە ناسراوە، ئۆتۆمبێلێکی بۆمبڕێژکراو تەقیوەتەوە، کە گومان دەکرێت داعش ئەوکارەی کردبێت، بەو ھۆیەوە ٣ کەس گیانیان لەدەست داوە و زیاتر لە ٢٠کەسی دیکەش بریندار بوونە، کە بەشێکیان برینیان گران بووە، لە ڕێگەی سێ ئەمبۆلانسەوە بەرەو مووسڵ گوازراونەتەوە."

حەسەن خەلۆ گوتی: "لەبەر ئەوەش دەزانین داعش ئەوکارەی کردووە، چونکە لە تەلەعفەر تەنیا شیعە و حەشد و لایەنگرانی حەشدی شەعبی لێیە، بۆیەش قوربانیانی تەقینەوەکە حەشد و لایەنگرانی ئەوان بوونە."

خەلۆ باسی لەوەش کرد: "داعش لە سنووری مووسڵ جموجووڵی زۆرە، بەتایبەت لە زنجیرەچیای بادۆش، پێش دوو ڕۆژ کەمینێکیان بۆ ھێزەکانی عێراق دانا و چەند کەسێکیان لێ کوشتن و بریندار کردن و دواتر فڕۆکە جەنگییەکان لێیان دان و چەکدارانی داعشیان کوشت."

خەلۆ گوتیشی: "ئەم تەقینەوەیە ھۆشدارییە بۆ ھێزە عێراقییەکان کە تەقینەوەکان لە سنووری پارێزگا مووسڵ لە لایەن داعش دەست پێ دەکەنەوە، چونکە زۆر شانەی نوستوویان لە ناوچەکەدا ھەیە."
kdp-