شاندێکی وەزارەتی پێشمەرگە و پارتی بەشدارییان لە کۆنفرانسێک لە ئەڵمانیادا کرد
لە شاری ھانۆڤەری ئەڵمانیا ڕێکخراوی نەتەوە یەکگرتووەکان بەشی ئەڵمانیا کۆنفرانسێکی لەژێر ناونیشانی ''ڕێگای بەرەو ئاشتی''دا ساز کرد و لەو کۆنفرانسەدا چەندین دیدار و کۆبوونەوە ئەنجام دران و باس لە ڕۆڵی هەرێمی کوردستان و هێزی پێشمەرگەی کوردستان کرا لە بەدەستهێنانی ئاشتی و سەقامگیریی ناوچەکەدا. شاندی وەزارەتی پێشمەرگە پێک ھاتبوو لە بەڕێزان، سەربەست لەزگین، بریکاری وەزیر و فەریق جەمال ئیمینکی، سوپاسالاری هێزی پێشمەرگەی کوردستان و لیوا سیروان بارزانی، فەرماندەی میحوەری مەخموور ــ گوێڕ و عەمید ڕوکن، ھەژار عومەر زەنگەنە، بەرپرسی پەیوەندییەکانی وەزارەتی پێشمەرگە. شاندی پارتییش پێک ھاتبوو لە ھۆشیار سیوەیلی، بەرپرسی پەیوەندییەکانی دەرەوەی پارتی دیموکراتی کوردستان و فەوزی ئەسعەد، جێگری بەرپرسی لقی شەش.
لە کۆنفرانسەکەدا بریکاری وەزارەتی پێشمەرگە وتارێکی دەربارەی ڕۆڵی مێژوویی و خەباتی پێشمەرگە و دروستبوونی وەزارەتی پێشمەرگە و ڕۆڵیان لە بەرگری لە کوردستان و تێشکاندنی داعش و دابینکردنی ئاسایش بۆ هەرێمی کوردستان بە هەموو پێکهاتە ئایینی و نەتەوەییەکان و ملوێنان ئاوارەوە پێشکەش کرد. پاشان تیشکی خستە سەر ئەو هاوکارییانەی کە پێشکەش بە هەرێمی کوردستان کراوە و گرنگییەکەی لە دابینکردنی ئاسایش و سەقامگیریدا. بریکاری وەزیری پێشمەرگە سوپاسی گەل و حکوومەتی ئەڵمانیای لە پشتیوانی و هاوکاریی هەرێمی کوردستان و مەشقپێکردنی هێزی پێشمەرگە، بەردەوام بوون و پەرەپێدانی ئەو جۆرە هاوکارییانە کاریگەریی دەبێت لەسەر دەستەبەرکردنی ئاشتی لە ناوچەکەدا. دوایی فیلمێکی دۆکیومێنتاری دەربارەی مێژووی کوردستان و هێزی پێشمەرگە کە لە لایەن وەزارەتی پێشمەرگەوە ئامادە کرابوو، پێشکەش کرا.
لە پانێڵێکدا کە لیوا سیروان بارزانی و ھۆشیار سیوەیلی و فەریق جەمال و عەمیدڕوکن ھەژار بەشدار بوون، باسیان لە بارودۆخی ئێستای کوردستان و داھاتووی هەرێمی کوردستان کرد. لە کۆتاییدا دیاریی وەزارەتی پێشمەرگە بەسەر چوار کەسایەتیی ڕێکخراوەکە و ویلایەتی باشووری ساکسۆنیدا دابەش کرا، کە ڕۆڵیان هەبووە لە ناساندنی هێزی پێشمەرگە و پشتیوانیی گەلی کوردستاندا.
kdp-
