بەرپرسێکی پارتی دیموکراتی کوردستان لە کەرکووک گوتی، لە کەرکووک پیلانێکی مەترسیدار دانراوە لە دژی کورد، ئەویش دروستکردنی بازنەیەکە بە دەوروبەری کەرکووکدا بۆ ئەوەی کوردەکان لەوێ دەربکرێن و عەرەبی لێ نیشتەجێ بکەن و ئێستا لە چەند ناوچەیەک پیلانەکە جێبەجێ دەکرێت.



عەدنان کەرکووکی، ئەندامی ئەنجومەنی سەرکردایەتیی پارتی دیموکراتی کوردستان کەرکووک _ گەرمیان، بە ماڵپەڕی فەرمیی پارتی دیموکراتی کوردستانی ڕاگەیاند: "لە کەرکووک پیلانێکی مەترسیدار دژی کورد دانراوە، بۆ ئەوەی کورد لەو ناوچانە دەر بکەن و عەرەبی لێ نیشتەجێ بکەن و قۆناغی یەکەمی پیلانەکەش وەرگرتنەوەی زەوییە لە جووتیارە کوردەکان لە سنووری قەزای داقووق و دواتریش دەرکردنیان، بۆیە بەردەوام کێشە بۆ جووتیارە کوردەکان دروست دەکەن بۆ ئەوەی ناچاریان بکەن ناوچەکانیان جێ بێڵن و عەرەب لە شوێنیان دابنێن."



عەدنان کەرکووکی گوتی: "لە داقووق دەست بە جێبەجێکردنی پلانەکە کراوە و دواتریش دەچێتە ناوچەکانی دوبز و لەیلان و ناوچەکانی دیکە، چونکە ئەوان دەیانەوێت بازنەیەک بە دەوروبەری کەرکووکدا دروست بکەن و ناوچەکە بە تەواوی لە کورد چۆڵ بکەن و تەعریبی بکەن."



عەدنان کەرکووکی دەشڵێ: "پێویستە سەرکردایەتیی کورد بێتە دەنگ و نوێنەرانی کوردیش لە بەغدا بێدەنگ نەبن، چونکە پرۆسەی بەعەرەبکردن بەچڕی لە سنووری کەرکووک دەستی پێ کردووە و ئەگەر پلانەکەیان سەر بگرێت لە سنووری ناوچەی دارەمانەوە بۆ ڕێگای کەرکووک _ ھەولێر شۆڕ دەبنەوە، بۆیە ناکرێت چیی تر بێدەنگی لەو پرۆسە و پلانە بکرێت."

ئاماژەیشی دا: "جگە لەوە، لە ناوخۆی کەرکووکیش فشارێکی زۆر لە کورد دەکرێت بۆ ئەوەی ناچار بن خانووەکانیان بفرۆشن و شارەکە چۆڵ بکەن و لەم پیلانە مەترسیدارتر نییە، بۆیە ھەرچۆنێک بێت پێویستە ڕێگری لە جێبەجێکردنی پلانەکە بکرێت."

ئەو بەرپرسەی پارتی ئەوەشی خستە ڕوو: "سەرانی ١٦ی ئۆکتۆبەر پێویستە بەرپرسیارەتیی ئەو مەترسییە لەئەستۆ بگرن و پێویستە دادگایی بکرێن بۆ ئەوەی چیی تر ھیچ کوردێک خیانەت نەکات و جارێکی دیکە کارەساتی لەو شێوەیە دووبارە نەبێتەوە."
kdp -