بەرپرسێکی پارتی دیموکراتی کوردستان دەڵێ دوای سەردانەکەی سەرۆک بارزانی بۆ بەغدا، زۆرینەی لایەنە سیاسییەکانی عێراق داوای دیداری سەرۆک بارزانی دەکەن.



شوان محەمەد، بەرپرسی لقی ٥ی پارتی لە بەغدا "لە دوای سەردانەکەی سەرۆک بارزانی و گەڕانەوەی، سێ ڕۆژ لەدوای یەک، ژمارەیەکی زۆر لە عەشایەری عەرەب لە ناوەڕاست و خوارووی عێراق و دیوانییە، سەردانی ئێمەیان کرد، داوای بینینی سەرۆک بارزانییان دەکرد، ئەمەش ئەوە دەگەیەنێت کە سەردانەکە ڕەنگدانەوەی زۆری لەسەر ئاستی شەقامیش هەبووە".



بەرپرسەکەی پارتی ڕوونیشی کردەوە: "دەتوانین بڵێین سەردانەکەی سەرۆک تەنیا بابەتێکی سیاسیی نەبووە، بەڵکوو لەسەر ئاستی شەقامیش دەنگدانەوەی زیاتری هەبووە".



لەبارەی وادەی سەردانی لایەنە سیاسی و عەشایەرییەکانی عێراق بۆ هەرێمی کوردستان، بۆ لای سەرۆک بارزانی، شوان محەمەد ئاماژەی بەوە کرد: "ناتوانم ئەو کاتە دیاری بکەم، لەبەر ئەوەی ئێستا هەرێمی کوردستان سەرقاڵی پێکهێنانی حکوومەتە، بەڵام سەردانە کەسییەکان بەردەوامن".



ڕوونیشی کردەوە: "لایەنە سیاسییەکان بە ئاشکرا ئەوەیان ڕاگەیاندووە کە هەڵوێستی سەرۆک بارزانی ڕوون و ئاشکرایە و دەزانین چۆن بیر دەکاتەوە و هەڵوێستی جێگیرە، هەروەها ڕاستگۆیانە مامەڵە لەگەڵ بابەتەکان دەکات".



شوان محەمەد گوتیشی: "سەرۆک بارزانی ڕای گەیاندووە کە ئامادەی لێکتێگەیشتنە لەسەر هەموو شت، هەروەها هێرش ناکەینە سەر خەڵک و ئەگەر هێرشمان بکەنە سەر بەرگری لە خۆمان دەکەین، هەموو دەرگاکانیش بۆ گفتوگۆ دەکەینەوە، بەڵام لەسەر بنەما گشتییەکانی کوردستان و ڕەهەندە نیشتمانییەکان سازش ناکەین".

bas news -