ئەمڕۆ چوارشەممە يوسف گۆران وه‌زيرى خوێندنى باڵاى حكومه‌تى هه‌رێمی كوردستان و مورتەزا عەبادى سەرکۆنسوڵى کۆمارى ئیسلامیی ئێران لە هەولێر لە كۆبوونەوەیەكدا بڕياریان دا وه‌زاره‌تى خوێندنى باڵای هەرێمی كوردستان پێشانگه‌يه‌ك بۆ به‌رهه‌مى زانكۆ ئێرانييه‌كان بكاته‌وه‌.



لەمبارەیەوە وەزارەتی خوێندنى باڵاى حكومه‌تى هه‌رێمی كوردستان لە راگەیەندراوێكدا بڵاوی كردەوە كە يوسف گۆران به‌گرنگییه‌وه‌ باسی له‌ به‌هێزكردنی په‌یوه‌ندییه‌كانی نێوان هه‌رێمی كوردستان و كۆماری ئیسلامی ئێران له‌ بواری خوێندنی باڵادا كردووه‌.


هه‌روه‌ها جه‌ختى كردووه‌ته‌وه‌ كه‌ له‌ هه‌وڵه‌كانيان بۆ په‌ره‌پێدانی په‌یوه‌ندییه دووقۆڵییەكاندا به‌رده‌وام ده‌بن.


هەر له‌و كۆبوونه‌وه‌يه‌دا بڕیار دراوە وه‌زاره‌تی خوێندنی باڵا و توێژینه‌وه‌ی زانستی رێكه‌وتنامه‌یه‌ك له‌گه‌ڵ زانكۆكانی ئێران ئیمزا بكات. گفتوگۆ له‌باره‌ی كردنه‌وه‌ی پێشانگه‌ی تایبه‌تی ناساندنی توانای زانكۆكانی كۆماری ئیسلامی ئێران له‌ هه‌رێمی كوردستان كراوه‌ بڕیاره‌ له‌ رۆژانی داهاتوودا بكرێته‌وه‌.
bas news -