به‌رپرسێ پشكا پشكنینێ ل رێڤه‌به‌ریا گشتیا گه‌شتۆگوزارا پارێزگه‌ها دهۆكێ راگه‌هاند كو ماسته‌ر پلانا پرۆژه‌یێن گه‌شتیاریى یێن چیایێ زاوا و سكرێ دهۆكێ ب دووماهى هاتینه‌ و چاڤ ل وه‌به‌رهێنه‌ره‌كى نه‌ بۆ ئه‌نجامدانا هه‌ردوو پرۆژه‌یان.

شه‌مال جه‌عفه‌ر، به‌رپرسێ پشكا پشكنینێ ل رێڤه‌به‌ریا گشتیا گه‌شتۆگوزارا پارێزگه‌ها دهۆكێ دیار كر: ”ل سالا 2013 ماسته‌رپلانا گه‌شتیارى ل هه‌رێما كوردستانێ هاتبوو چێكرن و د وێ ماسته‌ر پلانێ دا 204 پرۆژه‌ ب به‌ر پارێزگه‌ها دهۆكێ كه‌فتینه‌، به‌لێ ژ ئه‌گه‌رێ قه‌یرانا دارایى هه‌تا نوكه‌ كته‌كا كێم ژ ڤان پرۆژه‌یان هاتینه‌ ئه‌نجامدان و پتریا وان چاڤ ل ئه‌نجامدانێ نه‌ و گۆتیشى: ماسته‌ر پلانا پرۆژه‌یێن گه‌شتیاریى یێن چیایێ زاوا و به‌نداڤا دهۆكێ ب دووماهى هاتینه‌ و چاڤ ل وه‌به‌رهێنه‌ره‌كى نه‌ بۆ ئه‌نجامدانا هه‌ردوو پرۆژه‌یان“.

ئاشكرا ژى كر، كو هنده‌ك ژ ڤان پرۆژه‌یان ستراتیژى و گه‌شتیارى نه‌ و زۆر دگرنگن بۆ پێشڤه‌چوونا گه‌شتۆگوزارا پارێزگه‌ها دهۆكێ، وه‌كو پرۆژه‌یێ گه‌شتیاریێ چیایێ زاوا و سكرێ دهۆكێ و تلفریكا پرا ده‌لال بۆ پاركا ئامه‌د ل زاخۆ و چێكرنا پره‌كا مه‌زن ل ئامێدیێ و چه‌ندین تلفریك و پرۆژه‌یێن دى یێن گه‌شتیارى دناڤا ڤان پرۆژه‌یان دا هه‌نه‌.










باسنيوز