بەڕێوەبەرایەتیی پۆلیسی سلێمانی لە ڕاگەیاندراوێکدا ئاشکرای کرد، لە سنووری پێنجوێن سێ ئامێری بیرھەڵکەندن دەستیان بەسەردا گیراوە، کەسێکیش بە تۆمەتی دزی دەستگیر کراوە.

ئەمڕۆ شەممە 1/9/2018، بەڕێوەبەرایەتیی پۆلیسی سلێمانی ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ھاتووە: "لە چوارچێوەی ھەڵمەتەکانی بەڕێوەبەرایەتیی پۆلیسی پارێزگای سلێمانی، بە سەرپەرشتیی عەمیدی مافپەروەر ئاسۆ شێخ تەھا، بەڕێوەبەری پۆلیسی پارێزگای سلێمانی بۆ دەستگیرکردنی ئەو کەسانەی کە سەرپێچی دەکەن، بەمەبەستی پاراستن و چاکترکردنی ژینگە، بەشی پۆلیسی پێنجوێن لەھەڵمەتێکدا دەستیان گرت بەسەر سێ ئامێری بیرھەڵکەندندا".

ئاماژە بەوەش دراوە: "دوای ئەوەی لەلایەن ھەواڵدەرەوە ھێزەکانی بەشی پۆلیسی پێنجوێن ئاگادار کرانەوە کە چەند کەسێک خەریکی ھەڵکەندنی بیری نایاسایین لە سنووری شارۆچکەی پێنجوێن، دەستبەجێی ھێزەکانی پۆلیس پێنجوێن گەیشتنە شوێنی مەبەست و توانرا دەستبگیرێت بەسەر سێ ئامێری بیرھەڵکەندن".

ھەر لە ڕاگەیاندراوەکەدا باس لەوەش کراوە: "ھاوکات ھێزەکانی پۆلیسی پێنجوێن کەسێکیان دەستگیر کرد بەتۆمەتی دزی، ئێستاش تۆمەتبار بە فەرمانی دادوەر و بەپێی ماددەی 446 لە یاسای سزادانی عێراقی، ڕاگیراوە".

پۆلیس سلێمانی ڕوونیشی کردووەتەوە، کە ھەڵمەتی دەستگیرکردنی سەرپێچیکەران بەردەوامی دەبێت و ھەر کەسێک سەرپێچی بکات بە ھەڵکەندنی بیری نایاسایی، "دەستگیر دەکرێت و ڕووبەڕوی یاسا دەکرێتەوە".

بەڕێوەبەرایەتیی پۆلیسی پارێزگای سلێمانی – بەشی پۆلیسی پێنجوێن، سوپاسی ھاووڵاتییانی سنووری شارۆچکەی پێنجوێن دەکات، "کە بەردەوام ھاوکاریی ھێزەکانی پۆلیسن، لە ھەر ڕووداوێکی نەخوازراو، یان گوماناوی، یان ھەر سەرپێچییەک، ھێزەکانی پۆلیس ئاگادار دەکەنەوە".











باسنيوز