ئەمڕۆ گەنجێكی كوردی ڕۆژهەڵاتی كوردستان لە بەریتانیاوە مەزنترین خەڵاتی جیهانی لە بیركاریدا بەدەست هێنا، كە ناوی خەڵاتی فیڵتز یان "خەڵاتی نۆبڵ بۆ بیركاری"یە و چوار ساڵ جارێك بەزانای بواری بیركاری دەبەخشرێ.


خەڵاتەكە لە شاری ریۆ دی جانیرۆی بەرازیل پێشكەشی چوار زانای بیركاری كرا، یەكێكیان پڕۆفیسۆر کۆچەر بیرکار بوو، كە كوردێكی شاری مەریوانی رۆژهەڵاتی كوردستانە و لە وڵاتی بەریتانیا دەژیت.


پڕۆفیسۆر کۆچەر بیرکار لە كاتی وەرگرتنی خەڵاتەكەدا گوتی "هیوادارم دڵی 40 ملیۆن کوردم خۆش کردبێت".


جگە لە پرۆفیسۆر کۆچەر بیرکار، هەریەك لە ئەلسیۆ فیگالی، پیتەر شوڵتزێ و ئەکشای وۆنکاچیش لە بەرانبەر خزمەتەكانیان بەبواری بیركاری لە جیهاندا، خەڵاتەكەیان پێشكەش كرا.


پڕۆفیسۆر کۆچەر ماوەی چەند ساڵێکە وەک پەنابەر چووەتە بەریتانیا و ئێستە لە زانکۆی کەمبریج لەم وڵاتەدا مامۆستایە. کۆچەر بیرکار جگە لە خەڵاتەکە، بڕی 15 هەزار دۆلاریشی پێبەخشرا، كۆچەر پێشتریش خەڵاتی لورهۆڵمی لە بواری بیركاریدا بردووەتەوە.
bas news-