ئه‌مڕۆ له‌شارى سلێمانى، شاندێك به‌سه‌رۆكایه‌تی نێچیرڤان بارزانى، له‌گه‌ڵ شاندێكى یه‌كێتى به‌سه‌رۆكایه‌تی كۆسره‌ت ڕه‌سول، كۆبوونه‌وه‌، له‌و كۆبوونه‌وه‌یه‌ جه‌خت كرایه‌وه‌، كه‌ گرنگه‌ كورد وه‌ك تیمێك بچێته‌ به‌غدا.
‎
به‌پێی ڕاگه‌یاندراوێك، نیوەڕۆی ئەمڕۆ یەكشەممە 29/ 7/ 2018 لە شاری سلێمانی، كۆسرەت ڕەسول عەلی، جێگری سكرتێری گشتیی یەكێتی نیشتمانی كوردستان پێشوازی لە نێچیرڤان بارزانی، سەرۆكی حكوومەتی هەرێمی كوردستان و شاندێكی هاوڕێی كرد.


‎وه‌ك له‌ ڕاگه‌یاندراوه‌كه‌دا هاتووه‌: "لە كۆبوونەوەكەدا كە ژمارەیەك لە ئه‌ندامانى مەكتەبی سیاسی یه‌كێتى ئامادەی بوون، گفتوگۆ كرا لەبارەی بارودۆخی كوردستان و عێراق، هه‌روه‌ها لێكتێگەیشتنی هاوبەش وەك چارەسەری سەرەكی بۆ بارودۆخەكە سەیر كرا".


‎هەر لە كۆبوونەوەكەدا جێگری سكرتێری گشتی دەستخۆشی لە سەرۆكی حكومەتی هەرێمی كوردستان كرد بۆ كردنەوەی پڕۆژەی وێستگەی كارەبای 400 كەیڤی لە بازیان و هیوای خواست هەنگاوی باشتر بنرێ بۆ چارەسەركردنی كێشەی كارەباو خزمەتگوزاری زیاتر پێشكەشی هاووڵاتیان بكرێ.


‎هەڵبژاردنەكانی كوردستان و پێكهێنانی حكومەتی عێراق، تەوەرێكی دیكه‌ى كۆبوونەوەكە بوو، هەردوولا بەگرنگیان زانی، كە كورد وەك تیمێكی هاوبەش بچێتە بەغدا و لەكوردستانیش لایەنەكان بەوپەڕی دیموكراسییەوە بەشداری لە پڕۆسەكە بكەن.











باسنيوز