وەزیری ناوخۆی حکوومەتی هەرێمی کوردستان رایدەگەیەنێت، کە لەگەڵ حکوومەتی عێراق رێک کەوتوون لەسەر کردنەوەی فڕۆکەخانەکانی هەرێمی کوردستان.



کەریم شنگالی، وەزیری ناوخۆ بە (کوردستان 24)ی راگەیاندووە، هەولێر و بەغدا چوار رێک کەوتنیان کردووە و ئێستا رێککەوتنەکان لەبەردەم حەیدەر عەبادی، سەرۆک وەزیرانی عێراقە.



کەریم شنگالی هەروەها رایگەیاندووە، یەکێک لەو رێککەوتنانەی لەگەڵ حکوومەتی عێراق واژۆیان کردووە، تایبەتە بە کردنەوەی هەردوو فڕۆکەخانەی نێودەوڵەتیی هەولێر و سلێمانی.



وەزیری ناوخۆی حکوومەتی هەرێمی کوردستان، کە ئێستا بە سەردانێک لە ئەمریکایە، ئاماژەی بە پاڵپشتیی ئەو وڵاتە بۆ دانوستاندنی نێوان هەولێر و بەغدا کردووە و رایگەیاندووە، ”به‌رپرسانی ئه‌مریكی پشتگیریی له‌ هه‌رێمێكی كوردستانی یه‌كگرتوو و به‌هێز له‌نێو عێراقێكی فیدڕاڵیدا ده‌كه‌ن“.



دوای ئەنجامدانی ریفراندۆمی سەربەخۆیی کوردستان لە 25ـی ئەیلوولی 2017، کە تێیدا زیاتر لە %92ـی دەنگدەران دەنگیان بە سەربەخۆیی کوردستان و جیابوونەوە لە عێراق دا، حکوومەتی عێراق چەندین سزا و گەمارۆی بەسەر گەلی کوردستاندا سەپاند، لەوانە؛ داخستنی فڕۆکەخانە نێودەوڵەتییەکانی هەولێر و سلێمانی و بڕینی بەشەبودجەی هەرێمی کوردستان بە تەواوی.




k24