بەرپرسی لێژنەی ناوچەی داقووقی پارتی دیموكراتی كوردستان ئاشكرای كرد، میلیشیاكانی حەشدی شەعبی لە داقووق خانووی ئەندامێكی مەڵبەندی یەكێتییان تەقاندووەتەوە، دەشڵێت: "ئەو میلیشیایانە ڕۆژانە كردەوەی توندوتیژی ئەنجام دەدەن".



ئەمڕۆ سێشەممە 5/12/2017، هیوا ڕەشید، بەرپرسی لێژنەی ناوچەی داقووقی پارتی، ڕاگەیاند: ڕەوشی داقووق زۆر خراپە و شەوانە تێیدا تەقینەوە ئەنجام دەدرێت و شەوی دووشەممەی ڕابردوو، میلیشیاكانی حەشدی شەعبی سێ شوێنیان تەقاندووەتەوە، یەكێك لەو شوێنانە خانووی (حەسەن مالیك)ە كە ئەندامی مەڵبەندی یەكێتییە و كارگەی هاووڵاتییەكی عەرەبیشیان تەقاندووەتەوە كە ئەو هاووڵاتییە پێشتر زۆر هاوكاریی پێشمەرگەی دەكرد لە سنوورەكە و بەنزینخانەی عومەر بن عاسیشیان تەقاندووەتەوە و هۆكارەكەی بۆ ئەوە دەگەڕێتەوە كە ئەو بەنزینخانەیە ناوی عومەرە".



ئەو بەرپرسە لە درێژەی لێدوانەکەیدا گوتیشی: "شەوی پێشووتریش ماڵی سەید هیجران كاكەییان تەقاندەوە و حەشدی شەعبی ڕۆژانە كردەوەی توندوتیژی لە داقووق ئەنجام دەدات".



ڕۆژی 16ی ئۆکتۆبەری ڕابردوو، میلیشیاکانی (حەشدی شەعبی، سوپای پاسدارانی ئێران و حزبوڵای لوبنانی) بە ڕێککەوتن لەگەڵ گرووپی خیانەتی 16ی ئۆکتۆبەر، پەلاماری خورماتوو، کەرکووک و خانەقینیان دا و دەستیان بەسەر داگرت و سەدان هاووڵاتیی کوردیان شەهید و بریندار کرد و نزیکەی 200 هەزار کەسیش لەو سنوورە ئاوارە بوون.



ڕۆژی 18ی ئۆکتۆبەر کۆسرەت ڕەسول عەلی، جێگری یەکەمی سکرتێری گشتیی یەکێتی لە پەیامێکدا ڕای گەیاند: ”ئۆباڵی کارەساتەکانی کەرکووک و خورماتوو لە ئەستۆی کاڵفامەکانی نێو یەکێتی دایە“.


باسنیوز