بەرپرسی ھێزەکانی پێشمەرگەی کوردستان لە میحوەری گەرمەسێر ڕای گەیاند، ڕێگە بە هێزە عێراقییەکان نادەن، بچنەوە ئەو ناوچانەی لە ساڵی 2003 تێیدا بوون.

دوای ئەوەی ئەمڕۆ شەممە 2/12/2017، دەنگۆی ھاتنی ھێزێکی ئەمنیی عێراقی و میلیشیاکانی حەشدی شەعبی بۆ ناوچەی (شێخ باوە)ی نێوان شاری کەلار و شارەدێی جەلەولا لە سنووری ئیدارەی گەرمیان بڵاو بووەوە. مەحموود سەنگاوی، بەرپرسی ھێزەکانی پێشمەرگە لە میحوەری گەرمەسێر، ڕایگەیاند: "تا سەرلەبەیانی ئەمڕۆش، ھیچ ھێزێکی عێراقی نەھاتووەتە ناوچەکە، بەڵام نزیکەی 20 پۆلیسی فیدراڵی هاتوونەتە ناوچەکە، جگە لەوەش ھیچ ھێزێکی دیکە لەو ناوچەیە نییە“.

مەحموود سەنگاوی ئاشکرای کرد: ”ئێمە ڕێگە بە ھاتنی ھیچ ھێزێک بۆ ئەو ناوچانە نادەین“.

ڕۆژی 16ی ئۆکتۆبەری ڕابردوو، میلیشیاکانی (حەشدی شەعبی، سوپای پاسدارانی ئێران و حزبوڵای لوبنانی) بە ڕێککەوتن لەگەڵ گرووپێکی یەکێتی، پەلاماری خورماتوو، کەرکووک و خانەقینیان دا و دەستیان بەسەر داگرت و سەدان هاووڵاتیی کوردیان شەهید و بریندار کرد و نزیکەی 200 هەزار کەسیش لەو سنوورە ئاوارە بوون.

ڕۆژی 18ی ئۆکتۆبەر کۆسرەت ڕەسول عەلی، جێگری یەکەمی سکرتێری گشتیی یەکێتی لە پەیامێکدا ڕای گەیاند: ”ئۆباڵی کارەساتەکانی کەرکووک و خورماتوو لە ئەستۆی کاڵفامەکانی نێو یەکێتی دایە“.











باسنیوز