بەرپرسێکی وەزارەتی تەندروستیی حکوومەتی ھەرێمی کوردستان ئاشکرای کرد، کە لەمەوپاش پێشکەشکردنی خزمەتگوزاری لە کلینکە پزیشکییەکان بۆ توێژێکی خاوەن پێداویستییە تایبەتەکان بێ بەرانبەر، یان بە نرخێکی زۆر کەم دەبێت.

د. خاڵس قادر، گوتەبێژی وەزارەتی تەندروستی ڕایگەیاند: "لەسەر داواکاریی سەرۆکی کۆمەڵەی کورتە باڵاکانی کوردستان و بەھۆی ئەوەی کە بارودۆخی ئابوورییان باش نییە، داواکاریمان داوەتە سەندیکاکانی پزیشکان و پزیشکانی ددان، دەرمانسازی، شیکاران و بایۆلۆجی، داوامان لێ کردوون کە لەمەودوا چارەسەر و پشکنین و پێدانی دەرمان بۆ کورتە باڵاکان بێ بەرانبەر، یان بە نرخێکی کەم پێشکەشیان بکەن".

دەشڵێت: "پێمان وایە بەو ھەنگاوە خزمەتێکی کەم بە کورتە باڵاکان دەکرێت، بەتایبەت کە لە بارودۆخێکی ناھەموار دان و بەپێی گونجانیش لەو جۆرە ھەوڵانە بەردەوام دەبین و ھەوڵ دەدەین چین و توێژەکانی دیکەش بە تایبەت خاوەن پێداویستییە تایبەتەکان، لەو جۆرە خزمەتە سوودمەند بن".








باسنیوز