سەرۆکوەزیرانی کوردستان و باڵیۆزی ئەمەریکا لە عێراق، په‌یوه‌ندییه دووقۆڵییه‌كانی واشنتۆن ـ هه‌ولێر و په‌ره‌پێدانی زیاتریان له بواره جیاوازه‌كاندا به شێوه‌یه‌ك كه له به‌رژوه‌ندیی هه‌ردوولادا بێت، خستە به‌ر باس و گفتوگۆ.

نیوه‌ڕۆی ئه‌مڕۆ پێنجشه‌ممه ٣٠/١١/٢٠١٧ (نێچیرڤان بارزانی) سه‌رۆكوه‌زیرانی هه‌رێمی كوردستان، پێشوازی له (دۆگلاس سیلیمان) باڵیۆزی ئه‌مه‌ریكا له عیراق و شاندێكی یاوه‌ری كرد.

له دیدارێكدا كه (قوباد تاڵه‌بانی) جێگری سه‌رۆكوه‌زرانی هه‌رێمی كوردستان ئاماده‌ی بوو، باس له دوا پێشهاته سیاسییه‌كان و بارودۆخی ئه‌منیی عیراق و هه‌رێمی كوردستان و ناوچه‌كه و ڕه‌شنووسی پڕۆژهیاسای بودجه‌ی گشتیی عیراقی فیدراڵ كرا.

هه‌ر له دیداره‌كه‌دا په‌یوه‌ندییه دووقۆڵییه‌كانی واشنتۆن ـ هه‌ولێر و په‌ره‌پێدانی زیاتریان له بواره جیاوازه‌كاندا به شێوه‌یه‌ك كه له به‌رژوه‌ندیی هه‌ردوولادا بێت، خرانه به‌ر باس و گفتوگۆ.
تاوتوێكردنی په‌یوه‌ندییه‌كانی نێوان هه‌ولێر و به‌غدا و دوا پێشهاته‌كانی ئه‌و په‌یوه‌ندییانه و چاره‌كردنی كێشه هه‌ڵواسراوه‌كانی نێوان هه‌ردوولا، لایه‌نێكی دیكه‌ی دیداره‌كه بوو. هه‌ردوولا ده‌ستپێكردنی گفتوگۆ و دیالۆگێكی جددیی نێوان حكوومه‌تی فیدراڵ و حكوومه‌تی هه‌رێمی كوردستانیان له‌سه‌ر بنه‌مای ده‌ستووری عیراق، دووپات كرده‌وه.

kdp-