بۆ چاودێریکردنی ھەڵبژاردنەکانی ڕۆژئاوای کوردستان، ئەمڕۆ شاندێکی پەرلەمانی کوردستان سەردانی ڕۆژئاوای کوردستانی کرد، گوتەبێژی فراکسیۆنی زەردیش دەڵێت، ئەوانیش وەکو فراکسیۆنی زەرد بەشدارییان لەو سەردانەدا کردووە، ئەندامێکی ئەنجومەنی نیشتمانیی کورد لە سووریا (ئەنەکەسە) دەڵێت، ئەو ھەڵبژارنانە شەرعی نین و ئێمە بەشداریی تێدا ناکەین، چونکە تاکلایەنە بڕیاری لەسەر دراوە.

(د. محەمەد عەلی یاسین) بە ماڵپەڕی فەرمیی پارتی دیموکراتی کوردستانی ڕاگەیاند: "بۆ چاودێریکردنی ھەڵبژاردنەکانی ڕۆژئاوای کوردستان ھەموو فراکسیۆنەکانی پەرلەمانی کوردستان بانگێشت کراون بۆ ئەوەی وەکو پەرلەمانی کوردستان چاودێریی ئەو ھەڵبژاردنانە بکەن، بۆیە ھەر فراکسیۆنێک نوێنەری خۆی دیاری کردووە و ئێمەش نوێنەری خۆمان دیاری کردووە و (ئامینە زکری) وەکو نوێنەری ئێمە لەو شاندەدا بەشدارە، کە سەردانی ڕۆژئاوای کوردستانی کردووە."

گوتەبێژی فراکسیۆنی زەرد گوتیشی: "ئەمڕۆ شاندەکەی پەرلەمانی کوردستان بەرەو ڕۆژئاوای کوردستان بەڕێ کەوتن و بڕیارە تا ڕۆژی شەممەی دابێ لەوێ بمینێنەوە."

(نەواف حەسەن)، نوێنەری ئەنەکەسە لە ھەرێمی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: "ئێمە بە ھیچ شێوەیەک بەشداری لەو ھەڵبژاردنانەدا ناکەین، چونکە شەرعی نییە و تاکلایەنە بڕیاری لێ دراوە و تەنھا بۆ شاردنەوەی ڕاستییەکانە، چونکە ھیچ چارەسەرییەکیان بۆ دۆخی سووریا پێ نییە، جا پەنا بۆ ئەم جۆرە کارانە دەبەن."

(حەسەن) ڕوونیشی کردەوە: "لەبەر ئەوەی ئەوان سەر بە ڕژێمی سووریان ناتوانن لە کۆنگرەی جنێفدا بەشدار بن، بۆیە دەیانەوێت بەمە خۆیان مەشغووڵ بکەن و خەڵکیش لەخشتە ببەن، چونکە کۆمەڵگای نێودەوڵەتی داوای لێ کردوونە، خۆیان یەکلایی بکەنەوە، سەر بە ڕژێمی سووریان، یان ئۆپۆزسیۆن و فشاری زۆریان لەسەرە، ئەوانیش دەزانن سەر بە ڕژێمی سووریان، بۆیە لە ترسی خەڵکی ناوێرن بەئاشکرا قسە بکەن، ئینجا ھەستاون لەپڕێک ئەو ھەڵبژاردنانە ئەنجام دەدەن."

بڕیار وایە لە ١/١٢/٢٠١٧ سێ ھەڵبژاردنی شارۆچکەکان و شارەوانییەکان و کانتۆنەکان لە ڕۆژئاوای کوردستان بەڕێوە بچن.
kdp-