ئەندامێکی ئەنجومەنی پارێزگای کەرکووک لە پشکی یەکێتیی نیشتمانیی کوردستان ڕای گەیاند، ھێزێکی زۆری ئەمریکا لە سەربازگەی کەیوان لە کەکرووک جێگیر کراون و گواستنەوەی هێزەکانیشیان بەردەوامە. وەزارەتی پێشمەرگەش بێئاگایی لەو جموجۆڵە ڕادەگەیەنێت.



کەمێک لەمەوبەر، ئەحمەد عەسکەری، ئەندامی ئەنجومەنی پارێزگای کەرکووک لە پشکی یەکێتی، بە (باسنیوز)ی ڕاگەیاند: "لە دوێنێ شەوەوە بە کۆپتەر، ھێزی ئەمریکی لە سەربازگەی کەیوان دادەبەزێنرێن و ھاتنی ھێزیش بەردەوامە“.



ئەوەشی ڕوون کردەوە کە زانیارییان لەبارەی ژمارەی هێزەکە و ئەو ئەرکەی لە پێناویدا گواستراونەتەوە نییە. گوتیشی: ”لەسەر جۆری ئەو چەکانەی کە لای هێزەکەیە، ھیچ وردەکارییەکم لانییە".



هەر لەمبارەیەوە ھەڵگورد حیکمەت، بەڕێوەبەری گشتیی ڕاگەیاندن و هۆشیاریی نیشتمانی لە وەزارەتی پێشمەرگەی هەرێمی کوردستان بە (باسنیوز)ی ڕاگەیاند: "وەزارەتی پێشمەرگە ھیچ زانیارییەکی لەسەر گواستنەوەی ئەو ھێزەی ئەمریکا بۆ کەرکووک نییە".



باسنیوز