سەرۆکوەزیرانی کوردستان لە گوتاریدا لە ده‌یه‌مین ڕێوڕه‌سمی ساڵانه‌ی ڕاگه‌یاندنی هه‌ڵمه‌تی نیشتمانیی بۆ بنبڕكردنی توندوتیژی دژی ژناندا، داوای له‌ په‌رله‌مانی كوردستان كرد له‌ تاوتووكردنی یاساى لێبوردنى گشتییدا، ئه‌و لێبوردنه‌ به‌ هیچ شێوه‌یه‌ك ئه‌نجامده‌رانى تاوان به‌ ناوى شه‌ره‌فپارێزى، نه‌گرێته‌وه‌. بڕوای خۆیشی نیشان دا كه‌ به‌ په‌ره‌پێدانی دیموكراسی ده‌توانن مافی هاووڵاتیان دابین بكه‌ن و كۆمه‌ڵگه‌ به‌ره‌وپێش ببه‌ن.

سه‌رله‌به‌یانیی ئه‌مڕۆ دووشه‌ممه‌ ٢٧-١١-٢٠١٧ به‌ ئاماده‌بوونی (نێچیرڤان بارزانی) سه‌رۆكوه‌زیران و (قوباد تاڵه‌بانی) جێگری سه‌رۆكوه‌زیرانى هه‌رێمى كوردستان و ژماره‌یه‌ك له‌ وه‌زیر و په‌رله‌مانتار و به‌رپرسانی حزبی و حكوومى و كونسووڵ و نوێنه‌رانی وڵاتانی بیانی و پارێزه‌رانی مافی ئافره‌ت و چالاكوان و ئه‌كادیمستان، ده‌یه‌مین ڕێوڕه‌سمی ساڵانه‌ی ڕاگه‌یاندنی هه‌ڵمه‌تی نیشتمانیی بۆ بنبڕكردنی توندوتیژی دژی ژنان له‌ هه‌رێمی كوردستان به‌ڕێوه‌چوو كه‌ ماوه‌ی دوو هه‌فته‌ به‌رده‌وام ده‌بێت و له‌لایه‌ن ئەنجومەنی باڵای کاروباری خانمانه‌وه‌ سه‌رپه‌رشتی ده‌كرێت..
kdp-