چاودێرانی سیاسی و شارەزایانی بواری یاسایی و دەستووری باوەڕیان وایە، حكوومەتی عێراق بۆیە ئامادەی‌ گفتوگۆ و دانوستان لەگەڵ حكوومەتی هەرێم نییە، چونكە دەزانێت جێبەجێكردنی دەستووری عێراق لە بەرژەوەندیی كوردستانە و خۆیانن کە پێشێلیان کردووە.

دوای بەڕێوەچوونی ریفراندۆمی سەربەخۆییی هەرێمی كوردستان، حكوومەتی هەرێم بەردەوام دووپاتی كردووەتەوە كە ئامادەی دانوستانی "جیددی"ـیە لەگەڵ بەغدا و، كۆمەڵگای نێودەوڵەتییش لەبارەی ئەو پرسەوە و حكوومەتەكانی هەولێر و بەغدا هان دەدەن دەست بە دانوستان بكەن، بەڵام تا ئێستا بەغدا ئامادەیی خۆی لەو بارەیەوە نیشان نەداوە.
(د. ئیبراهیم شەرەفانی) شارەزا لە بواری یاسا و دەستوور، بە ماڵپەڕی‌ فەرمیی پارتی‌ دیموكراتی كوردستانی ڕاگەیاند، "حكوومەتی عێراق پێویستە یان دەستوور جێبەجێ بكات یان ددان بە ڕیفراندۆم و سەربەخۆییی كوردستاندا بنێت، چونكە ئەگەر تەماشا بكەین ئەو گرژییەی نێوان حكوومەتی عێراق و هەرێمی كوردستان لە بنەڕەتدا دەگەڕێتەوە بۆ پابەندنەبوونی حكوومەتی عێراق بە دەستوورەوە، گومانی تێدا نییە حكوومەتی عێراقیش دەزانێ دەستوور جێبەجێ بكات لە بەرژەوەندیی هەرێمی كوردستانە، بۆیە تا ئێستا ئامادە نین بۆ گفتوگۆی جیددی لەگەڵ حكوومەتی هەرێمدا".

(شەرەفانی) گوتی، "بۆ یەكلاكردنەوەی ناوچە كوردستانییەكانی دەرەوەی ئیدارەی هەرێم، ئەگەر ماددەی 140 جێبەجێ بكەن، ئەوا ئەو ناوچانەی سنووری ماددەکە دەگەڕێنەوە باوەشی كوردستان، لەگەڵ ئەوەیشدا دەبینین ماددەی (121) گرێ دراوە بە بوودجەی كوردستانەوە و پێویستە ڕەوانەی بكەن، هەروەها ماددەی (112) تایبەتە بە گرێبەستی نەوت كە لە بەرژەوەندیی كوردستانە و ماددەی (9)ـیش بریتییە لە پرسی پێشمەرگە و پێكهێنانی لەشكری عێراق كە لەسەر بنەمای هاوسەنگی دەبێت، هەروەها ماددەی (105) كە پێویستە كوردستان بەشدارییەكی ڕاستەقینەی هەبێت لە تەواوی دامودەزگاكانی حكوومەتی عێراق و، بەپێی ماددەی (106)ـیش پێویستە داهاتی عێراق بە شێوەیەكی شەفاف بێت و بە یەكسانی بەسەر تەواوی پێكهاتەكانی عێراقدا دابەش بكرێت، ئەمە و چەندان ماددەی تری دەستووری لەلایەن حكوومەتی عێراقەوە پێشێل كراون و پێیانەوە پابەند نین، بۆیە ئێستا لە دیالۆگ ڕادەكەن و دەزانن پابەندبوون بە دەستوور لە بەرژەوەندیی كوردستانە."

بۆچی بەغدا دەستوور پێشێل دەكات؟ هەرێم دەتوانێ چی بكات؟ ئەو پرسیارانەن کە (مەدحەت محەممەد) چاوێری سیاسی لەبارەیانەوە دەڵێ، "هیچ كاتێك حكوومەتەكانی عێراق بڕوایان بە مافی نەتەوەی كورد نەبووە، ئەوەی (عەبادی) دەیكات هاوشێوەی (سەددام حوسێن)ـی سەرۆکی پیشووی عێراقە كە دەیگوت یاسا وەكوو لاستیک وایە و چۆنیان بووێت وا ڕایدەكێشن، كەواتە ئەوانە نە باوەڕیان بە یاسا هەیە نە بە دەستوور، هەرچەندە (عەبادی) زۆرترین وشە كە لە بەرانبەر كوردستاندا بە كاری دەهێنێ جێبەجێكردنی دەستوورە، كەچی خۆی زیاتر لە (55) ماددەی ئەو دەستوورەی پێشێل كردوون، بە داخەوە وڵاتە زلهێزەكانیش خۆیان بێدەنگ كردووە، چونكە عێراق دەوڵەتە، بۆیە پێویستە خەڵك بڕژێنە سەر شەقام و داوا بكرێت بەغدا ماددە دەستوورییەكان جێبەجێ بكات، چونكە كە جێبەجێیكردن، ڕاستەوخۆ كەركووك و تەواوی ناوچە كوردستانییەكان دەگەڕێنەوە سەر هەرێم".

ئەو چاودێرە سیاسییە، بۆ ماڵپەری فەرمیی پارتی دیموكراتی كوردستان دەشڵێ، "باوەڕ ناكەم (عەبادی) مافی كورد بدات، بۆیە ئەوەی دەبێت كورد بیكات ئەوەیە كە، سنوورێك بۆ خیانەت دابنێت و لە پەرلەمان بە یاسا جۆرەكانی دیاری بكات و دواتر ناوماڵی كورد رێك بخاتەوە."
kdp-