ئەمڕۆ شەممە 25/11/2017، ڕۆژی جیهانیی بەرەنگاربوونەوەی توندوتیژی دژ بە ئافرەتانە، بڕیاردەری لێژنەی داكۆكیكردن لە مافەكانی ئافرەت لە پەرلەمانی كوردستان ڕای دەگەیەنێت، لە هەرێمی كوردستان توندوتیژی دژ بە ئافرەتان لە هەڵكشان دایە.

حەیات مەجید پەرخی، بڕیاردەری لێژنەی داكۆكیكردن لە مافەكانی ئافرەت لە پەرلەمانی كوردستان، لەمبارەوە ڕایگەیاند: "هەڵبەتە توندوتیژی بەرامبەر بە ئافرەتان لە هەرێمی كوردستان لە هەڵكشان دایە و ئەمڕۆ كە 25ی نۆڤەمبەرە ماوەیەك دیاری كراوە بۆ هەڵمەتی بەرنگاربوونەوەی توندوتیژی دژ بە ئافرەتان، ئەم هەڵمەتەش بۆ هۆشیاركردنەوەیە پتر لەڕووی كۆمەڵایەتی و یاساییەوە، ئەمەش پتر لەڕێگەی ڕاگەیاندنەوە دەكرێت، بۆ ئەوەی ئافرەتان هۆشیار بكرێنەوە لە بەرامبەر ئەو توندوتیژییانەی كە دەرهەقیان دەكرێت و بۆ ئەوەی بتوانن مافەكانی خۆیان بەدەست بهێنن".

ئەو پەرلەمانتارە لە درێژەی لێدوانەکەیدا ئەوەشی خستە ڕوو: "یەكێك لە هۆكارە سەرەكییەكانی پەرەسەندنی ئەم دیاردەیە قەیرانی داراییە كە كاریگەرییەكی نەرێنیی زۆری هەبووە و ئێستا ئێمەش وەكوو لێژنەكەمان لە پەرلەمان، هیچ ئامارێكی ئەوتۆمان لەبەردەست نییە، بەڵام بەپێی زانیارییەكانمان ئامارەكان لە هەڵكشان دان و ئامارەكان ساڵی دوو جار لەلایەن بەڕێوەبەرایەتیی توندوتیژی دژ بە ئافرەتانەوە بڵاو دەكرێنەوە".

هەروەها حەیات مەجید، گوتیشی: "كەیسێكی زۆری توندوتیژی دژ بە ئافرەتان دێتە لامان كە هەندێك لەو كەیسانەش پڕ لە تراژیدیان و هۆكارێكی دیكەی ئەو توندوتیژیانەش بۆ خراپ بەكارهێنانی تۆڕە كۆمەڵایەتییەكان دەگەڕێتەوە".











باسنیوز