پاش ئەوەی بڕە نەوتێک لە بەغداوە بە پارێزگای سلێمانی گەیشت، بەرپرسێک لە ئیدارەی گەرمیان ئاشکرای دەکات لەو ڕێژەیەی بۆ ئەو پارێزگایە دیاری کراوە،‌ بەشی گەرمیانیشی تێدایە.

یادگار فەتاح، بەڕێوەبەری نەوت و کانزاکانی گەرمیان، ڕاگەیاند: "لەو بڕە نەوتە سپییەی بۆ پارێزگای سلێمانی نێردراوە، بەشی گەرمیانیشی تێدایە".

گوتیشی: "بەھۆی ئەوەی فۆڕمی خۆراکی سنووری ئیدارەی گەرمیان بەشێکی کۆنە ‌و بەشێکی نوێیە،‌ بۆیە ناتوانرێت لەسەر فۆڕمی خۆراک ئەو نەوتی سپییە دابەش بکرێت".

بەڕێوەبەری نەوت و کانزاکانی گەرمیان باسی لەوەش کرد، کە لە سنووری سلێمانی بە کارتی زیرەک ئەو نەوتە دابەش دەکرێت، "بەڵام لە گەرمیان گرفتی کارتی زیرەکمان ھەیە لە ‌ماوەیەکی نزیکدا لەگەڵ کۆمپانیاکان ڕێک دەکەوین و چارەسەری دەکەین و کارتی زیرەک دەردەکەین".

جەختی لەوەش کردەوە: "ئەو بڕە نەوتەی بەشی گەرمیانە لە عەمبارەکانی خۆمان ھەڵیدەگرین، تاوەکو کارتی زیرەک دەردەکەین و لەپاش ئەوە دەست دەکەین بەدابەشکردنی".

یادگار فەتاح ئەوەشی ئاشکرا کرد، کە کار دەکەن و لە ماوەیەکی "زۆر نزیکدا، کە ڕەنگە نەگاتە مانگێکی دیکە"، ھەر خێزانێک بەرمیلێک نەوتی بەسەردا دابەش دەکرێت.
bas news-