بەرپرسی دۆسییەی ئەمنیی کەرکووک کە لە لایەن میلیشیاکانی حەشدی شەعبییەوە دانراوە، ئاشکرای دەکات، یەکێتیی نیشتمانیی کوردستان لە کەرکووک، 150 تیرۆریستی دەستگیرکراویان ڕادەستیان کردووە.

لیوا مەعن سەعدی کە پێشتر ئەفسەرێکی هەواڵگریی سەردەمی بەعس بووە و لە دوای خیانەتەکەی 16ی ئۆکتۆبەری گرووپێکی نێو یەکێتی و ڕادەستکردنی کەرکووک بە میلیشیاکانی سەر بە ئێران، پۆستی بەرپرسی دۆسیەی ئەمنیی کەرکووکی پێ دراوە، بە ماڵپەڕی (غەدپرێس)ی عێراقی ڕاگەیاندووە: "یەکێتیی نیشتمانیی کوردستان لە کەرکووک، 150 تیرۆریستیان ڕادەستی دەزگای دژە تیرۆری عێراق کرد و ئێستا ئەو دەستگیرکراوانە لێکۆڵینەوەیان لەگەڵ ئەنجام دەدرێت".

ئەلسەعدی، ئەوەشی خستەڕوو، ھەڵمەتی پشکنینیان لە سەرجەم گەڕەکەکانی کەرکووک دەست پێکردووە. ئاشکراشی کرد، لە ھەر ماڵێکدا زیاتر لە چەکێک ھەبووبێت، دەستگیراوە بە سەریدا و تەنیا ڕێگە دراوە یەک پارچە چەک، لە یەک ماڵدا ھەبێت، ”ئەویش پێویستە تۆمار بکرێت".

ڕۆژی 16ی ئۆکتۆبەری ڕابردوو، میلیشیاکانی (حەشدی شەعبی، سوپای پاسدارانی ئێران و حزبوڵای لوبنانی) بە ڕێککەوتن لەگەڵ گرووپێکی یەکێتی، پەلاماری خورماتوو، کەرکووک و خانەقینیان دا و دەستیان بەسەر داگرت و سەدان هاووڵاتیی کوردیان شەهید و بریندار کرد و نزیکەی 200 هەزار کەسیش لەو سنوورە ئاوارە بوون.

ڕۆژی 18ی ئۆکتۆبەر کۆسرەت ڕەسول عەلی، جێگری یەکەمی سکرتێری گشتیی یەکێتی لە پەیامێکدا ڕای گەیاند: ”ئۆباڵی کارەساتەکانی کەرکووک و خورماتوو لە ئەستۆی کاڵفامەکانی نێو یەکێتی دایە“.









باسنيوز