نوێنەرێ کوردانی شەبەک لە ئەنجومەنی پارێزگای موسڵ باس لەوە دەکات، ھاتوچۆی کوردانی شەبەک لە ھەرێم بۆ ئەو دیوی ساتری ھێزی پێشمەرگە لە دەشتی نەینەوا بەزەحمەتە و پێویستی بە ئاسانکاری ھەیە. فەرماندەیەکی ھێزی پێشمەرگەش دەڵێت، ئەو کارەی دەکرێت بۆ پاراستنی ئەمنیەتی ھەرێمی کوردستانه و بڕیارە بۆ چارەسەرکردنی ئەو کێشەیە لە چەند رۆژی داھاتوودا رێگایەکی تایبەت بە کوردانی شەبەک بکرێتەوە.



"غەزوان حامد" نوێنەری کوردانی شەبەک لە ئەنجومەنی پارێزگای موسڵ بە ئاژانسی ھەواڵی زاگرۆسی راگەیاند: "کوردانی شەبەک گلەیی ئەوە دەکەن کە ھاتوچۆیان بۆ ئەو دیو ساتری ھێزی پێشمەرگە لە دەشتی نەینەوا زەحمەتە و ھەندێک رێکاری پێویستە، بۆیە بڕیارە لە چەند رۆژی داھاتوودا ئێمە وەکو نوێنەرانی کورد کۆبینەوە و داواکاریەک بۆ ئەوەی ئاسانکاری بۆ ئەو خەڵکە بکرێت ئاراستەی سەرۆکی ھەرێمی کوردستان دەکەین، لەبەر ئەوەی ئەو ناوچانەش کوردستانین و پێویستە وەکو بەشێک لە کوردستان مامەڵەی لەگەڵ بکرێت."



ھەر لەمبارەیەوە فەرماندەی ھێزی پێشمەرگە لیوا "بەھرام عەریف یاسین" بە ئاژانسی ھەواڵی زاگرۆسی راگەیاند: "ئەو رێکارانەی دەگیرێنەبەر بۆ پاراستنی ئەمنیەتی ھەرێمی کوردستانه و بەرامبەر ھەموو کەسێکیش ناگیرێتەبەر تەنھا ئەوانەی گومانیان لێ ھەیە، ئەگەر نا ھاتوچۆ کردن رۆژانە ھەیە و خەڵک بە ئارەزووی خۆی ھاتوچۆ دەکات بۆ ئەو دیوی ساتری ھێزی پێشمەرگە."



لیوا بەھرام عەریف یاسین گوتی: بڕیارە لەچەند رۆژی داھاتوو رێگایەکی تایبەت بۆ ھاتوچۆی کوردانی شەبەک بکرێتەوە و ئەوکات بە ئارەزووی خۆیان ھاتوچۆ دەکەن و دەتوانن کەلوپەل لە ھەرێمی کوردستان بۆخۆیان بگوازنەوە کە پێداویستی رۆژانەیانە و ئێمەش ھاوکاریان دەبین.
payamner-