جێگری پارێزگای دهۆك بۆ كاروباری ئاوارەكان رایگەیاند، حكوومەتی هەرێم بەردەوام هاوكاری ئاوارەكان دەكات، مانگانە هەر ئاوارەیەك پێویستی بە 60 دۆلارە بۆ دابینكردنی خزمەتگوزاری و خواردن و خواردنەوە. روونیشیكردەوە، ئاوارەكان گلەیی لە حكوومەتی عێراق دەكەن كە هاوكارییەكانی لەو ئاستەدا نیە كە ئێمە چاوەڕوانمان دەكرد، چونكە زۆربەی ئاوارەكان لە ناوچەكانی عێراق هاتوونە، بۆیە پێویست بوو عێراق زیاتر هاوكاری ئاوارەكانی كردبایە.



ئیسماعیل محەمەد، جێگری پارێزگای دهۆك بۆ كاروباری ئاوارەكان بە "هەولێر"ـی رایگەیاند، لە پارێزگای دهۆك نزیكەی 700 هەزار ئاوارە و 250 هەزار پەنابەری رۆژئاوا هەن، ئەوان لە 25 كەمپدا نیشتەجێ كراون و بەردەوامیش ئاوارەیەكی زۆری مووسڵ دەگاتە دهۆك و تا ئێستا زیاتر لە 10 هەزار كەسی ئەو پارێزگایە گەیشتوونەتە دهۆك و لە كەمپەكاند نیشتەجێ كراون، ئاوارەكان لە رووی دارایی و كۆمەڵاتییەوە بوونەتە بارگرانی بۆ خەڵكی دهۆك.


گوتیشی: حكوومەتی هەرێم بەردەوام هاوكاری ئاوارەكان دەكات، بە باشترین شێوە بەڕێوەیان دەبات و تەنانەت باشتر لە گەلێك لە دەوڵەتانی جیهان خزمەت بە ئاوارە و پەنابەران دەكات، بە تایبەتی لە رووی دارایی و ئەمنییەوە، مانگانە هەر ئاوارەیەك پێویستی بە 60 دۆلارە بۆ دابینكردنی خزمەتگوزاری و خواردن و خواردنەوە.


محەمەد، روونیشیكردەوە، پارێزگای دهۆك بە هاوكاری زیاتر لە 100 رێكخراوی ناوخۆ و بیانی كە ئێستا لە سنووری دهۆك هەن، خزمەتی ئاوارەكان دەكەن، حكوومەتی عێراقیش هاوكاری ئاوارەكانی كردووە، بەڵام لەو ئاستەدا نیە كە ئێمە چاوەڕوانمان دەكرد و بەردەوام ئاوارەكانیش گلەیی دەكەن، چونكە زۆربەی ئاوارەكان لە ناوچەكانی عێراق هاتوونە، بۆیە پێویست بوو عێراق زیاتر هاوكاری ئاوارەكانی كردبایە.


جێگری پارێزگای دهۆك بۆ كاروباری ئاوارەكان، زیاتر دەڵێ: پێش ئۆپەراسیۆنی مووسڵ، ئێستایش هەبوونی ئەو ڕێژە زۆرە ئاوارەیە بارگرانیەكی زۆری لەسەر ئیدارەی دهۆك دروست كردووە، لەگەڵ دەستپێكردنی ئۆپەراسیۆنی مووسڵ 5 كەمپی دیكە لە سنووری دهۆك دروست كراون، لەو شوێنانە نزیكەی 15 هەزار یەكەی نیشتەجێ بوون دروستكراون و لەو كەمپانە 10 هەزار كەس نیشتەجێ كراون.


لە كۆتاییدا ئیسماعیل محەمەد، جێگری پارێزگای دهۆك بۆ كاروباری ئاوارەكان ئەوەشی دركاند، پاش ئۆپەراسیۆنی ڕزگاركردنی شاری مووسڵ خەڵكی شەبەك و هەندێك هاووڵاتی دیكە گەڕانەوە سەر ماڵ و حاڵی خۆیان".
hawler -