ئەندامێكی ئەنجوومەنی نیشتمانی كورد لە سووریا رایگەیاند، پەیەدە، هەڵمەتێكی فراوان بۆ سەربازیكردنی ناچاری دەست پێ كردووە و بەشێكی زۆر لە كوڕ و كچانی رۆژئاوا دەنێرێتە بەرەكانی جەنگ و بە كوشتن دەدات، بێ ئەوەی بستێك خاكی رۆژئاوا ئازاد بكەن، ئەوەیش كارێكی ترسناكە و، كورد بووەتە كەمینە لە 70 ساڵی رابردوو ئەوەی حكوومەتی بەعس نەیانتوانیوە بكات، پەیەدە زۆر بە ئاسانی ئەوەی كرد. روونیشیكردەوە، ئەگەر پەیەدە پێگری بە ڕێككەوتنەكانی هەولێر و دهۆكی كردبایە، ئێستا حاڵی رۆژئاوا بەو شێوەیە نەبوو و، وەك هەرێمی كوردستان لە دوژمنانی كورد ڕزگار دەبوو و رۆژ بۆ رۆژیش ئاوەدان دەبوویەوە.


د. كاوە ئازیزی، ئەندامی ئەنجوومەنی نیشتمانی كورد لە سووریا بۆ "هەولێر" گوتی: پەیەدە كار بۆ رۆژئاوای كوردستان ناكات، بەڵكو ئەوان گرووپێكی توندڕەو و چەكدارن، بە سیفەتی داگیركەر، مامەڵە لەگەڵ رۆژئاوا دەكەن، ئەوان سیستەمی خوێندن و ئابووری و، هیچ پرۆژەیەكیان لەو ناوچانە نەهێشتووە، سیاسەتی گرتن و ئەشكەنجەدان و زۆرداریان گرتووەتەبەر، بە زۆرە مڵێ گەنجانی رۆژئاوا دەبنە سەربازی و بە كوشتن دەدەن بێ ئەوەی یەك بست خاكی رۆژئاوا ئازاد بكەن، هەروەها پێگرییان بە ڕێككەوتنی هەولێر یەك و دوو، دهۆكیان نەكرد، ئەگەر پەیەدە پێگری بەو ڕێككەوتنانەی كردبایە و جێبەجێ كردبانە، ئێستا رۆژئاوای كوردستان، وەك هەرێمی كوردستان ڕزگار دەبوو لە دوژمنانی كورد، بەڵام پێگریان پێ نەكرد، هەروەها ڕێگە نادەن هیچ هێزێكی دیكە لە رۆژئاوا هەبێت، هەتا ڕێگە نادەن شەهیدانی رۆژئاوا بگەڕێنەوە، بۆیە كاتی ئەوە هاتووە بە پەیەدە بگوترێت تەواو تۆ ناتوانی چی دیكە رۆژئاوا بپارێزی، بۆیە پێویستە لێرە نەمێنی.


د. كاوە ئازیزی، گوتیشی: لە قامیشلۆ دژی كردەوەكانی پەیەدە خۆپیشاندانێك بەڕێوەچوو، چونكە كاتێك كە تەرمی پێشمەرگەیەك ڕەوانەی رۆژئاوای كوردستان كرایەوە، ئاسایشی پەیەدە تەرمەكەی ڕفاندبوو و ڕێگەی نەدا خەڵك پێشوازی بكات، بەس بۆ ئەوەی خەڵك كۆنەبێتەوە، هۆكارەكەیش بۆ ئەوە دەگەڕێتەوە كە پەیەدە لە شەقام دەترسێ و دەزانێت بۆ شەهیدانی ئێمە بە هەزاران خەڵك كۆدەبنەوە، بۆیە ڕێگری لەخەڵك دەكەن بچنە پێشوازی شەهیدانی پێشمەرگە.


ئەو ئەندامەی ئەنجوومەنی نیشتمانی كورد لە سووریا زیاتر دەڵێ: لە شارەكانی ڕۆژئاوای كوردستان، بەتایبەتی لە قامیشلۆ، پەیەدە دەستی بە هەڵمەتێكی فراوانی دەستگیركردنی گەنجان كردووە كە بەشێكی زۆریان بەرەو سەربازیی ناچار دەبەن، دوای ماوەیەك لە مەشیقی سەربازی، دواتر ڕەوانەی بەرەكانی جەنگیان دەكەن، هەروەها پەیەدە فۆڕمێكی سیاسی بە خەڵكی ڕۆژئاوا پڕدەكاتەوە، ماڵ بە ماڵ بۆ پڕكردنەوەی ئەو فۆڕمە دەگەڕێن كە لایەنی سیاسییان دەردەخات، بۆ ئەوەی گوشار بخەنە سەر لایەنگرانی لایەنەكانی دیكە.


ئەندامی ئەنجوومەنی نیشتمانی كورد لە سووریا ئەوەشی دركاند، پەیەدە ڕێگە نادات پێشمەرگەكانی رۆژئاوا بگەڕێنەوە، هۆكارەكەیش بۆ ئەوە دەگەڕێتەوە كە دەزانن ئەوانە پێشمەرگەی كوردستانن، ئەوان بەرگری لە خاك و گەلی رۆژئاوا دەكەن، سیفەتێكی كوردستانی دەدەنە پاڵ رۆژئاوا، بەڵام پەیەدە خزمەتی دوژمن دەكات، چونكە جێگەی قبووڵ نیە كە تۆ ڕێگە نەدەی خەڵكی ئەو بەشە بگەڕێنەوە سەر ماڵ و حاڵی خۆیان و بەرگری لە گەلی خۆ بكەن، كێ ئەو مافەی بە تۆ داوە كە ڕێگری لە خەڵكی رۆژئاوا بكەی.


د. كاوە ئازیزی، روونیشیكردەوە، ئێستا لە رۆژئاوای كوردستان رۆژ بۆ رۆژ ژمارەی خەڵكی عەرەب زیاتر دەبن، كورد لەو بەشە بووەتە كەمینە، لە 70 ساڵی رابردوو حكوومەتی بەعس نەیانتوانی بوو گۆڕینی دیموگرافی بكات، پەیەدە ئەوەی كرد، ئەگەر پێشمەرگەكانی رۆژئاوا نەگەرێنەوە و بەرگری لەو بەشەی كوردستان نەكەن، رۆژئاوای كوردستان نامێنێت، پێشمەرگەكانی رۆژئاوا ئەگەر بگەڕێنەوە بە هۆی ئەوەی زیاتر لە دوو ساڵە لە دژی داعش شەڕ دەكەن و مەشقپێكراون دەتوانن زۆر بە ئاسانی رۆژئاوای كوردستان لە دوژمنانی كورد بپارێزن.


لە كۆتاییدا د. كاوە ئازیزی، ئەندامی ئەنجوومەنی نیشتمانی كورد لە سووریا ئەوەشی دیاركرد، كۆنگرەی ئاستانە، زۆر گرنگی خۆی هەیە، هیوادارین ئاگربەست ڕابگەینرێت و شەڕ ڕابوەستێت و بە دەنگ خەڵكی ناوچەكە بچن و ئەو كەسانەی لە زیندانەكاندان ڕزگار بكرێن، ئاشتی لەو وڵاتە دروست بێت، بۆ ئەوەی خەڵكی ئەو ناوچانە بە ئاسوودەیی بژین و، مافەكانمان بەپێی دەستوور دیاری بكرێن".
HAWLER -