نوێنەری سەرۆک ھۆزە عەرەبەکانی خورماتوو، ھێما بۆ ئەوە دەکات کە عەرەبەکانی خورماتوو، لەگەڵ گۆڕینی ئامرلی لە شارەدێوە بۆ شارۆچکە نین.


شێخ سائیر بەیاتی، نوێنەری سەرۆک ھۆزە عەرەبەکانی خورماتوو، ئەمڕۆ چوارشەممە 18/1/2017، بە (باسنیوز)ی ڕاگەیاند: "عەرەبەکانی خورماتوو، لەگەڵ گۆڕینی ئامرلی لە شارەدێوە بۆ شارۆچکە نین، لەبەرئەوەی دەستێکی ڕەش لە ناو حەشدی شەعبی ھەوڵێ لە ھەوڵی ئەوەدان ئامرلی بکەنە شارۆچکە و دەیانەوێت دیموگرافیای ناوچەکە بگۆڕن و بیکەنە شیعەنشین".


نوێنەری سەرۆک ھۆزە عەرەبەکانی خورماتوو، ئەوەشی خستەڕوو: "ڕێژەی دانیشتوانی ئامرلی و دەوروبەری 35 ھەزار کەسە، بەڵام لە ناوەندی شارەدێکە تەنیا 13 ھەزار کەسن کە زۆرینەیان لە تورکمانی شیعە پێکدێن و ئەوانی تر دانیشتووی گوندەکانی سەر بە ئامرلین کە سەرجەم دانیشتووانی گوندەکانی سەر بەو شارەدێیە عەرەبن و لە گەڵ بوونی ئامرلی بە شارۆچکە نین".


گوتیشی: "ئێستاش تەواوی دانیشتوانی گوندەکانی دەوروبەری ئامرلی، پێشتر لە دەستی داعش و ئێستاش لە بەر حەشدی شەعبی ئاوارەی کەرکووک و شارو شارۆچکەکانی ھەرێمی کوردستان بوونە، بەبێ ڕای ئەوانیش ھەڵساون بە گۆڕینی ئامرلی لە شارەدێوە بۆ شارۆچکە".

bas news-