ئەندامێکی ئەنجومەنی نوێنەرانی عێراق ئاماژە بۆ ئەوە دەکات کە ھەموو ھەوڵێک دەدەین بۆ ئەوەی ھەڵبژاردنی ئەنجومەنی پارێزگاکانی عێراق، کەرکووکیش بگرێتەوە.



محەمەد عوسمان، نوێنەری کەرکووک، لە ئەنجومەنی نوێنەرانی عێراق، ئەمڕۆ چوارشەممە 18/1/2017، بە (باسنیوز)ی ڕاگەیاند: "وەکو نوێنەرانی کورد لە ئەنجومەنی نوێنەرانی عێراق، ھەموو ھەوڵێک دەخەینە گەڕ بۆ ئەوەی ھەڵبژاردنی ئەنجومەنی پارێزگاکانی عێراق، کە بڕیارە لە 16/9/2017 بەڕێوە بچێت، کەرکووکیش بگرێتەوە".



ئەو پەرلەمانتارە کوردە، ئەوەشی خستەڕوو: "لەبەرئەوەی ماوەی زیاتر لە 11 ساڵە ھەڵبژاردن، بۆ ئەنجومەنی پارێزگای کەرکووک نەکراوە، بە بیانووی ئەوەی کەرکووک تایبەتمەندی خۆی ھەیە".


گوتیشی: "لە پڕۆژەیاسای ھەڵبژاردنی ئەنجومەنی پارێزگاکان لە ماددەی 37 دا کە لە دوو بڕگە پێکھاتووە، ھێما بۆ ئەوە دەکات کە کەرکووک دەتوانێت بەشداری ھەڵبژاردنەکان بکات و ئێمەش ھەوڵی جددی بۆ جێبەجێکردنی ئەو ماددەیە دەدەین، بۆ ئەوەی ھەڵبژاردن لە کەرکووکیش ئەنجام بدرێت".
bas news-