لە لێدوانێکدا بۆ ماڵپەڕی حکوومەتی ھەرێمی کوردستان، "سەفین دزەیی" وتەبێژی فەرمیی حکوومەت ڕایگەیاند: چەند پەر‌لەمانتا‌رێکی کورد لە پەرلەمانی عێراق ڕایانگەیاندووە کە لە کۆبوونەوەیەکدا "حەیدەر عەبادی" سەرۆک وەزیرانی عێراق پێی گوتوون حکوومەتی ھەرێمی کوردستان ڕۆژانە ملیۆنێک و سێسەد ھەزار بەرمیل نەوت ھەناردەی دەرەوە دەکات.



لەمبارەیەوە دزەیی گوتی: نازانین ئەگەر ئەو پەرلەمانتا‌رانە بووبن بە وتەبێژی سەرۆک وەزیرانی عێراق، بەڵام ئێمە نە بە شێوەیەکی فەرمی و نە نافەرمیش نەمانبیستووە بەڕێز عەبادی قسەیەکی وای کردبێت. ژمارەی ڕاستەقینەی ھەناردەکردنی نەوتی ھەرێمی کوردستان ئەو ژمارانەن کە وەزارەتی سامانە سروشتییەکانی ھەرێمی کوردستان لە ڕاپۆرتەکانیدا بڵاویاندەکاتەوە و ھەمان ئەو ژمارانەن کە لە کۆمپانیاکانی بەرھەمھێنانی نەوت وەریاندەگرێت.



لە کۆتاییی لێدوانەکەیدا سەفین دزەیی گوتی: ئەو پەرلەمانتارانە، یانیش با بڵێین ئەو وتەبێژانەی سەرۆک وەزیرانی عێراق باشتر وابوو بەرلەوەی بۆ خۆدەرخستن و لە خۆیانەوە لێدوانی بێبنەما و بێسەروبەری لەو شێوەیە بدەن، پرسیارێک لە لایەنە پەیوەندارەکانی وەزارتی سامانە سروشتییەکان بکەن تاکو ژمارەی ڕاستەقینەی ھەناردەکردنی نەوتی ھەرێمی کوردستانیان دەستکەوێت.
payamner -