بەشێک لەو کەسانەی لە وەزارەتی کاروباری شەھیدانی حکوومەتی ھەرێمی کوردستان مووچەی شەھیدانە یانیش زیندانی سیاسیان ھەبووە لە بەغداش ھەمان مووچەیان وەرگرتووە.

بەپێی زانیاریەکان لەو ماوەیە وەزارەتی کاروباری شەھیدانی ھەرێمی کوردستان چەند کەسێکی لەم جۆرەی ئاشکر کردووە و داوا لە بەغدا کراوە بۆ پێدانی لیستی ناوی ئەو کەسانەی کە مووچەی شەھیدانە و زیندانی سیاسی وەردەگرن بۆ ئەوەی وردبینی لە لیستەکان بکرێت.

مەحمود حاجی ساڵح وەزیری کاروباری شەھیدان و ئەنفالکراوەکانی حکوومەتی ھەرێمی کوردستان بە باسی راگەیاند: خەڵک ھەبووە لە بەغدا و لە ھەرێمی کوردستانیش مووچەی شەھیدانە و زیندانی سیاسی وەرگرتووە ھەیانە خۆیان ھاتووە گوتویەتی ٢ مووچەم ھەیە لەسەر داوای خۆیان ئەوەی ئێرەیان بڕاوە و لە بەغدا وەری دەگرن، بەڵام خەڵکی تریش ھەبووە بەپێی بەدواداچوونی ئێمە ئەوەی لێ ئاشکرا کراوە و مووچەکەی بڕاوە.

ئاماژەی بەوەدا دیاردەی ٢ مووچەی شەھیدان لە نێوان ھەرێمی کوردستان و بەغدا بەردەوامی ھەیە، گوتیشی: داوامان لەبەغدا کردووە لیستی مووچەی ئەو کەسانەمان بۆ بنێرن کە لە ھەرێمی کوردستان مووچەی شەھیدانە و زیندانی سیاسیان ھەیە بۆ ئەوەی وردبینیان تێدا بکرێت بۆ ئەوەش وەفدێکمان ناردووە بۆ بەغدا.

مووچەی مانگانەی شەھیدان و زیندانیانی سیاسی لە حکوومەتی عێراقی لە نێوانی ٦٠٠ ھەزار دینار بۆ ملیۆنێک دینارە.

وەزیری کاروباری شەھیدان ئاشکراشیکرد رێکاری یاسایی بەرامبەر ئەو کەسانە دەگیرێتە بەر کە ٢ مووچەی شەھیدانەیان ھەبووە" دەبێت ھەموو ئەو مووچانە بگێرنەوە کە لە ماوەی ڕابردوودا لە ھەرێمی کوردستان وەریان گرتووە".

payamnerf -