حەشدی شەعبی بەرگری لە مانەوەی هێزەکانی پارتی کرێکارانی کوردستان (پەکەکە) لە شنگال دەکات و بەرپرسێکی پارتیش بە بەشێک لە “هەوڵەکانی ئاژاوەگێڕی” وەسف دەکات.

پاش ئەوەی ھادی جەزائیری، یەکێک لە فەرماندە باڵاکانی حەشدی شەعبی، لە ڕاگەیاندراوێکدا پشتیوانیی هێزەکەی بۆ مانەوەی گەریلاکانی پەکەکە لە شنگال ڕاگەیاند و جەختی لەوە کردەوە کە ئامادەبوونی ئەو هێزانە لە ناوچەکە: “زۆر باشترە لە ئامادەبوونی ھێزەکانی تورکیا".

لەمبارەیەوە وەحید باکۆزی، بەرپرسی لقی شنگالی پارتی دیموکراتیی کوردستان، ڕایگەیاند: “ئاگادارین ماوەیەکە حەشدی شەعبی لەسەر پەکەکە بەرگری دەکەن، بە جۆرێک کە دەیانەوێت ڕەوایەتی بە مانەوەی پەکەکە لە شنگال بدەن”. جەختیشی لەوە کردەوە کە حەشدی شەعبی بە پلان و بۆ دروستکردنی فیتنە و ئاژاوە ئەم کارە دەکەن.

باکۆزی باسیشی لەوە کرد: “ئێمە پشتیوانییەکانی حەشدی شەعبی بۆ پەکەکە بە ئاسایی دەزانین، چونکە خۆیان بوونەتە بەشێک لە حەشدی شەعبی و لەو چوار چێوەیەشدا وەک ئەوان هاوکاری وەردەگرن".

پێشتر حکوومەتی هەرێمی کوردستان بە فەرمی داوای لە هێزەکانی پارتی کرێکارانی کوردستان کردووە، بەڵام تاوەکوو ئێستا پەکەکە هێزەکانی لە شنگال نەکشاندووەتەوە.






باسنیوز