بەرپرسێکی پارتی ئاماژە بەوە دەکات، لە سنووری پارێزگای سلێمانی، پارتی کرێکارانی کوردستان (پەکەکە) دەستی بە جموجۆڵ کردووەتەوە و لە چەند شوێنێکیش هەڕەشەیان لە چەند لایەنێکی سیاسی کردووە.

فاروق عەبدولکەریم، بەرپرسی دەزگای ڕۆشنبیری و ڕاگەیاندنی لقی 12ی پارتی دیموکراتیی کوردستان لە سنووری پارێزگای هەڵەبجە، ڕاگەیاند: “لە سنووری پارێزگای هەڵەبجە، لە تەوێڵە و مۆردین و گریانە، (پەکەکە) بوونیان هەیە و هەندێکجار بە ئاشکرا و هەندێک جاریش بە شاراوەیی دەردەکەون و جگە لەوەی بە چەکیشەوە دەبینرێن”.

ئەوەشی ڕوون کردەوە کە لە ناوچەکانی سازان و چنار، لە سنووری هەڵەبجە، هێزەکانی (پەکەکە) بوونیان هەیە و لە ناوچەی (گریانە) بازگەی گومرگیان داناوە و باج و سەرانە لە خەڵکی وەردەگرن.

فاروق عەبدولکەریم جەختیشی لەوە کردەوە کە ئەو جموجۆڵانەی پەکەکە، بە فەرمانی سەرکردایەتیی خۆیانە و دەیانەوێت سلێمانی وەک کانتۆن بناسێنن. گوتیشی: “هەندێک لە حزبەکانی کوردستانی باشوور بە دۆست و نزیک لە خۆیان هەژمار دەکەن، دەیانەوێت شەقام لە دژی پارتی بجووڵێنن”.

بەرپرسەکەی پارتی ئەوەی دووپات کردەوە کە لە سنووری هەڵەبجەدا پەکەکە دەستی بە “جموجۆڵێکی نامۆ” کردووە و بە شێوەی جۆراوجۆر “هەڕەشەش لە چەند حزبێک دەکەن”.