ئه‌مڕۆ یەكشەممە 11ـی 12ـی 2016 لە فڕۆكەخانەی نێودەوڵەتیی هەولێر، مەسعود بارزانی، سەرۆكی هەرێمی كوردستان پێشوازی لە ئاشتن كارتەر وەزیری بەرگریی ئەمەریكا و شاندێكی یاوەری كرد كە پێكهاتبوو لە ئێلیسا سڵۆتكین یاریدەدەری وەزیری بەرگری و دۆگڵاس سڵیمان باڵیۆزی ئەمەریكا لە عێراق و جەنەڕاڵ داونسێند فەرماندەی هێزەكانی ئەمەریكا لە عێراق و ژمارەیەك بەرپرس و ڕاوێژكاری وەزارەتی بەرگریی ئەمەریكا.





به‌پێی ڕاگه‌یه‌ندراوێكى سه‌رۆكایه‌تى هه‌رێمى كوردستان، لە كۆبوونەوەیەكدا وەزیری بەرگریی ئەمەریكا سوپاس و پێزانینی خۆی ئاراستەی بارزانی و هێزی پێشمەرگە كرد لە سەركردایەتیكردنی شەڕی داعش و تێكشكاندنی تیرۆریستان و هەروەها پێزانینی بۆ هەماهەنگی و كاری هاوبەشی سه‌رۆكى هه‌رێمى كوردستان و سەرۆك وەزیرانی عێراقی هەبوو كە بووەتە هۆی هەماهەنگیی نێوان پێشمەرگە و سوپای عێراق و بەهۆیەوە دەستكەوت و سەركەوتنی گەورە لە شەڕی داعش بەدەستهاتووە.



هەروەها سوپاسی بەجێگەیاندنی بەڵێنەكانی بارزانی و پێشمەرگەی كرد لەجێبەجێكردنی ڕێككەوتنەكان و تێكشكاندنی داعش. ئەوەیشی خستەڕوو كە گەلی ئەمەریكا پاڵپشتی پێشمەرگەیە و پشتیوانی لە ئۆپەراسیۆنی لەناوبردنی داعش دەكات.



لە بەشێكی دیكەی وتەكانیدا، وەزیری بەرگریی ئەمەریكا ڕایگەیاند كە وڵاتەكەی پابەندی ئەو ڕێككەوتنە دەبێت كە لەگەڵ پێشمەرگەدا هەیەتی لە بواری هاوكاری سەربازی و دارایی هێزی پێشمەرگەی كوردستان.



لەبەرانبەردا مه‌سعود بارزانی، سوپاسی سەرۆك و جێگری سەرۆك و وەزیری بەرگری و گەلی ئەمەریكای كرد كە پشتیوانی گەلی كوردستانن لە شەڕی دژی تیرۆردا و وێڕای ئاماژەدان بە قوربانیدانی پێشمەرگە ئەوەیشی ڕاگەیاند كە پێشمەرگە لەشەڕی تیرۆردا ئەوەی لەسەر شانی بووە بە سەركەوتوویی ئەنجامی داوە. بارزانی باسی هەڕەشەی داعش و هزری تیرۆری كرد بۆ سەر كۆی مرۆڤایەتی و ژیان و بە لەبەرچاوگرتنی ڕۆڵ و پێگەی ئەمەریكا لە ئاستی جیهانیدا بە پێویستی زانی كە ئەمەریكا لە بەرپرسیارێتیی خۆی بۆ بەرگریكردن لە ئازادی و بەهاكان بەردەوام بێت.



هەر لەو كۆبوونەوەیەدا كە بە ئامادەبوونی ژمارەیەك بەرپرسی سەربازی و سیاسیی هەرێم بەڕێوەچوو، باس لە بارودۆخی مەیدانیی بەرەكانی شەڕی تیرۆریستان لە پارێزگای نەینەوا و هەروەها هەنگاوەكانی شەڕی دژی داعش لە سووریا كرا.



جێگەی ئاماژەپێكردنە كە بەر لە كۆبوونەوەی سه‌رۆكى هه‌رێمى كوردستان و وەزیری بەرگریی ئەمەریكا لە مەراسیمێكی تایبەت دا میدالیای ئازادیی وەزارەتی بەرگریی ئەمەریكا لە لایەن وەزیری بەرگریی ئەمەریكا پێشكەشی چوار پێشمەرگە كرا بە نوێنەرایەتیی هەموو هێزی پێشمەرگەی كوردستان. لە مەراسیمەكەدا وەزیری بەرگریی ئەمەریكا لە وتەیەكی كورتتدا باسی لە ئازایەتی و بوێریی پێشمەرگە كرد و ستاییشی ڕۆڵی پێشمەرگەی كرد كە قارەمانانە توانی داعش تێكبشكێنێت. هەروەها ئەوەیشی بە پێشمەرگەكان گوت كە " ئێوە شەرەفتان بۆ خۆتان و گەلەكەتان تۆمار كرد".
KDP-