فراکسیۆنی پارتی دیموکراتی کوردستان لە پەرلەمانی کوردستان، له بەیاننامەیەکدا ئیدانەی تیرۆرکردنی دکتۆر "ھوشیار ئیسماعیل"ی کرد.



ئەمەش دەقی بەیاننامەکەیه:



"شەوی ڕابردوو لە شاری ھەولێری پایتەختی ھەرێمی کوردستان، دکتۆر ھوشیار ئیسماعیل کە زانایەکی پایەبەرز و بەڕێزی ئەو شارەبوو، تیرۆرکرا، ئەمەیش بە لای ھەموومانەوە جێگەی داخ و ھەڵوەستە و تێڕامانە، چونکە دکتۆر ھوشیار کەسایەتییەکی بەڕێز و خۆشەویست و ئاشتیخوازی ئەم شارە بوو، لە بواری ئاشتەوایی کۆمەڵایەتی و بڵاوکردنەوەی بیری میانڕەوی، ڕۆڵی بەرچاوی ھەبووە و ئەمەیش وایکردووە، کە خۆشەویستی ھەموو چین و توێژەکانی کۆمەڵ بێت و بەلای کاربەدەستانی شاریشەوە ڕێزلێگیراو بێت.



پارتی دیموکراتی کوردستان لە سۆنگەی بڕوابوون بە پێکەوە ژیان و ڕێزگرتن لە پیرۆزییە ئاینییەکان، ھەمیشە ڕێزی لە مامۆستایانی ئاینی پیرۆزی ئیسلام گرتووە و لە ھەموو سەردەم و قۆناغەکاندا، بیروڕا و سەرنج و تێبینییەکانییانی بە ھەند وەرگرتوون، ئەو ڕێزەیش ھەمیشە وەک خۆی دەمێنێتەوە.



ئێمە کاتێک لە شەڕی دژی تیرۆرداین، بە بەردەوامی خەمی ئەوەمان ھەبووە و ھەیە، کە دوژمنانی گەلەکەمان، چ لە ناوخۆ و چ لە دەرەوە، لە ڕێگەی کردەوەی دژە ئینسانییەوە، ھەوڵی لێکترازانی لایەنە سیاسییەکان و پێکھاتە کۆمەڵایەتییەکانی بدەن و ئاگری فیتنە و ئاشوب ھەڵگیرسێنن، بەڵام سوپاس بۆ خودا و ماندووبوونی ھێزی پێشمەرگەی کوردستان و ھێزە ئەمنییەکان، کوردستان ئارامە و ھەرکەسێکیش نییەتێکی وای ھەبێت، لە دەستی یاسا ڕزگاری نابێت.



شاری ھەولێر ناوەندێکی گرنگی سیاسی و عەسکەری و ئابووری ناوچەکەیە، بۆیە دەزگە ئەمنییەکان بەوپەڕی توانایانەوە، ئەرکی ماندوونەناسانەی خۆیان ڕادەپەڕێنن و ئەمەیش جێگەی ڕێزە، داوا لە ھەموو لایەکیش دەکەین، کە چاوەڕوانی ئەنجامی لێکۆڵینەوەکان بن و لە بەخشینەوەی تۆمەتدا پەلە نەکرێت، ھێزە ئەمنییەکان لە دۆزینەوەی ئەنجامدەرانی ئەم تاوانە مەزنە، ھەموو ھەوڵی خۆیان خستۆتە گەڕ و ھیوادارین بە زووترین کات، ئەو دەستە ڕەشەی لە بندا ببڕن."
PAYAMNER -