ئێوارەی ئەمڕۆ "ئاشتن کارتەر" وەزیری بەرگریی ئەمەریکا لەڕێی تەلەفۆنەوە پەیوەندی بە "مەسعود بارزانی" سەرۆکی ھەرێمی کوردستان کرد.



لە پەیوەندییە تەلەفۆنییەکەدا وەزیری بەرگریی ئەمەریکا خۆشحاڵی و پیرۆزبایی خۆی بە سەرۆک بارزانی ڕاگەیاند بەبۆنەی سەرکەوتنەکانی ھێزی پێشمەرگە و سوپای عێراق لە بەرەکانی شەڕی دژی تیرۆریستانی داعش. ھەروەھا پێزانینیشی بۆ ئاستی باشی ھەماھەنگی و کاری ھاوبەشی پێشمەرگە و سوپای عێراق ھەبوو لە شەڕی تیرۆریستاندا.



ھەر لەم پەیوەندییەدا ھەردوولا جەختیان لە بایەخ و گرنگیی بەردەوامیی ھەماھەنگی نێوان ھاوپەیمانان و پێشمەرگە و سوپای عێراق بە تایبەت لەنێوان ھێزی پێشمەرگە و ھێزەکانی سوپای عێراق کردەوە.



لە بەشێکی تری ئەم پەیوەندییە تەلەفۆنییەدا ھەردوولا بیروڕایان لەبارەی ھەنگاوەکانی جێبەجێکردنی پلانی ئازادکردنی موسڵ و دەرووبەری ئاڵۆگۆڕ کرد و قۆناغەکانی ئۆپەراسیۆنەکە ھەتا ئێستا بە سەرکەوتوو وەسفکرا.



ھەر لەم پەیوەندییە تەلەفۆنییەدا سەرۆک بارزانی سوپاسی گەل و حکوومەت و سوپای ئەمەریکای کرد کە لە شەڕی تیرۆردا پشتیوانی پێشمەرگە بوونە و ھیوای سەرکەوتنی یەکجارەکی لە بەرانبەر تیرۆریستان خواست.
payamner-