بەڕێوەبەری سایلۆی هەولێر، بەهۆی سکاڵایەک کە لەلایەن دەستەی نەزاهەی هەرێمی کوردستانەوە پێشکەش کراوە، دەستگیر کراوە.

سەرچاوەیەکی ئاگادار کە نەیویست ناوەکەی ئاشکرا بکرێت، ڕایگەیاند: “بەڕێوەبەری سایلۆی هەولێر چەند ڕۆژێکە دەستگیر کراوە و ڕەوانەی بەڕێوەبەرایەتیی گرتن و گواستنەوەی هەولێر کراوە”. سەرچاوەکە ئەوەشی ئاشکرا کرد، بەڕێوەبەری سایلۆی هەولێر ، بەتۆمەتی دیارنەمانی بڕێکی زۆر لە دانەوێڵە (گەنم و جۆ) و هەروەها بابەتی پەیوەندیدار بە بەبازاڕکردن (تەسویق) دەستگیر کراوە.



هەر لەمبارەیەوە سەرچاوەیەک لە پۆلیسی هەولێر کە بەهۆی ئەوەی مۆڵەتی قسەکردنی لەسەر ئەو دۆسیەیە پێ نەدراوە، ڕایگەیاند: “ئەو دۆسیەیە لەسەر سکاڵای دەستەی دەستپاکیی هەرێمی کوردستانە و پەیوەندیی ڕاستەوخۆی بەوانەوە هەیە”.

ئەمە لە کاتێکدایە کە تاوەکوو ئێستا هیچ دامەزراوەیەکی ئەمنی و ئیداریی شاری هەولێر بە فەرمی، دەستگیرکردنی ئەو بەرێوەبەرەی لە شاری هەولێر ڕانەگەیاندووە.














باسنیوز