وه‌زاره‌تی كشتوكاڵ له‌ راگه‌یه‌نراوێكدا كه‌ وێنه‌یه‌كی بۆ ئاژانسی هه‌واڵی زاگرۆس نێردراوه‌، تێیدا هاتووه‌، ئه‌مڕۆ سێشه‌ممه‌ وەزارەتی كشتوكاڵ و سەرچاوەكانی ئاو رێكخراوی (IOM) یاداشتنامەیەكی لێكگەیشتنیان تایبەت بە مەشق و راهێنانی بواری سەوزەو بە بازاڕكردن واژۆكرد.

لە رێوڕەسمی واژووكردنی یاداشتنامەكەدا كە دكتۆر ئەنور ئەحمەد ئیبراهیم بەڕێوەبەری گشتی توێژینەوەو رێنمایی كشتوكاڵ ئامادەبوو، سەرەتا عه‌بدولسه‌تار مه‌جید وەزیری كشتوكاڵ و سەرچاوەكانی ئاو دەستخۆشی لە رێكخراوی ناوبراو كرد بۆ ئەم هەماهەنگی و هاوكارییە، كە تایبەتە بە راهێنان و مەشق پێكردنی جووتیاران ، دووپاتیشی كردەوە كە ئەم هەنگاوە هاریكارە بۆ خزمەتكردنی ئاوارەكانی سوریاو و پەنابەرانی عێراق كە لە ئێستادا لە هەرێمی كوردستانن و ژمارەیان پتر لە 1 ملیۆن و 800 هەزار دەبێت، وێڕای سوودمەندبوونی ژمارەیەك جووتیارانی كوردستان لەو پڕۆژەیە.

ئاماژەی بە بەرنامەكانی وەزارەت كرد لە بواری پێشخستنی كەرتی كشتوكاڵ سەرباری ئەو شەڕەی كە هێزی پێشمەرگە بۆ پاراستنی خاك و گەلی كوردستان دژ بە دڕندەترین دوژمن ( تیرۆریستانی داعش) دەیكات و لەم بوارەشدا زیاترین قوربانی داوە، بەڵام لە جێبەجێكردنی پلانەكانی وەزارەت هەر بەردەوام دەبین.

وه‌زیری كشتوكاڵ پێویستیی كوردستانیشی لە رێكخراوو دامەزراوە نێودەوڵەتییەكان لە بواری شارەزایی و تەكنەڵۆجیای سەردەم لە كەرتی كشتوكاڵ بە گرنگ نرخاند، ئامادەیی خۆیشی بۆ كارئاسانی و هاوكاریی خستەڕوو.

لەلای خۆشیەوە بەڕێوەبەری هەولێری رێكخراوی كۆچی نێودەوڵەتی خۆشحاڵیی خۆی بەم پڕۆژەیە دووپاتكردەوە و ئامادەیی رێكخراوەكەی بۆ هەماهەنگیی زیاتر دەربڕی.

بەپێی ئەم یاداشتە رێكخراوی كۆچی نێودەوڵەتی پڕۆژەكەی بریتی دەبێت لە دامەزراندنی چەند خانوویەكی پلاستیكی بۆ بەرهەمهێنانی سەوزە لەسەر شێوازی سەردەمیانە لە چەند ناوچەیەكی پارێزگاكانی هەرێمی كوردستان و شێوازی نوێی مەشق و راهێنان بۆ ماوەی سێ مانگ، پڕۆژەكە (6) ساڵ بەردەوام دەبێت و چەندین لایەنی دیكە لەخۆ دەگرێت وەك چاككردنەوەی خانووە پلاستیكەكان و نۆژەنكردنەوەی هۆڵی راهێنان و شوێنی عەمباركردن و ئەنجامدانی توێژینەوەو راهێنانی جووتیاران و تاقیكردنەوەی جۆری سەوزەی نوێ، هەروەها قەڵاچۆكردنی مێرووە زیان بەخشەكان و بەخێوكردنی ئاژەڵ و پەلەوەڕ لەناو كێڵگەكان و دواتر بەرهەمهێنان و بە بازاڕكردنی سەردەمیانە.
payamner-