لە سەرەتای دەستپێکردنی ئۆپەراسیۆنی رزگارکردنی موسڵ لە ١٧ تشرینی یەکەمی ٢٠١٦ تائێستا زیاتر لە ٣٦,٦٠٩ کەس ئاوارەی ھەرێمی کوردستان بوونە و لە کەمپەکانی خازر و حسن شام و زێلکان نیشتەجێ کراون و دەکاتە ٧٨% کۆی ئاوارەکانی موسڵ و دەوروبەری.



ناوەندی ھاوبەشی ھەماھەنگی قەیرانەکان رایگەیاند رۆژانە زیاتر لە ھەزار کەس خۆیان دەگەیینە سەنگەرەکانی پێشمەرگە و دواتر ‌ بۆ ناوچە ئارامەکان دەگوازرێنەوە و لە کەمپەکان نیشتە جێ دەکرێن.



ھەر لە سەرەتای دەستپێکی ئۆپەراسیۆنی رزگارکردنی گەیارە لە مانگی ئاداری ٢٠١٦ زیاتر لە ٣٣,٠٠٠ کەس لە ناوچەکانی گەیارە، شەرگات و حاجی عەلی ئاوارە بوون و لە کەمپی دیبەگە نیشتەجێ کران ئەو ژمارەیەش دەکاتە ٨٤% ئاوارەکانی ئەو ناوچانە و رۆژانە زیاتر لە سەد کەس ئاوارە دەبن و لەو کەمپەکان نیشتەجێ دەکرێن.



کۆی گشتی ئەو ئاوارانەی لەماوەی ھەردوو ئۆپەراسیۆنی گەیارە و چوار ھەفتەی یەکەمی ئۆپەراسیۆنی موسڵ ئاوارەی ھەرێمی کوردستان بوونە، دەگاتە زیاتر لە ٦٧,٠٠٠ کەس، کە لە ‌دانیشتوانی ناوچەکانی باکووری پارێزگای سەڵاحەدین (قەزای شڕگات)، باشووری موسڵ و دواتر لە ناوچەکانی دیکەی دەوروبەری موسڵ و بەری چەپی شارەکە پێک دێت.



پاش قەیرانی سوریا لە ساڵی ٢٠١١ و ھاتنی داعش بۆ عێراق لە ساڵی ٢٠١٤ چەندین شەپۆلێکی گەورەی ئاوارە و پەنابەر روویان لە ھەرێمی کوردستان کرد، کە دواترینیان لە ماوەی چوار ھەفتەی یەکەمی ئۆپەراسیۆنی موسڵ بووە و تا ئێستا١,٤١١,٣١٤ ئاوارەی ناوخۆی عێراق و ٢١٦,٨٦٠ پەنابەری سوری لە ھەرسێ پارێزگای ھەولێر و دھۆک و سلێمانی نیشتەجێ کراون، بە جۆرێک کە ٤٠% ئاوارەکانی عێراق و ٩٧% پەنابەرانی سوریا لە عێراق، لە ھەرێمی کوردستانن.



ناوەندی ھاوبەشی ھەماھەنگی قەیرانەکان لە وەزارەتی ناوخۆی ھەرێمی کوردستان بە ھاوبەشی لەگەڵ ئاژانسەکانی نەتەوە یەکگرتووەکانی و وەزارەتی کۆچ و کۆچبەرانی عێراق و لایەنەکانی دیکەی پەیوەندیدار کار بۆ نیشتەجێکردنی ئەو ئاوارانە دەکات کە لە میانەی ئۆپەراسیۆنی موسڵ ھانای خۆیان بۆ ھەرێمی کوردستان دەھێنن.
payamner-