ئەمڕۆ ساڵیادی رزگارکردنەوەی شاری شنگالە، کە سەرۆکی هەرێمی کوردستان راستەوخۆ سەرپەرشتیی پرۆسەی رزگارکردنەوەکەی دەکرد.



رۆژی 10ـی حوزەیرانی 2014، چەکدارانی رێکخراوی توندڕەوی داعش لە سەردەمی سەرۆک وەزیرانیی نوری مالیکی، لە خاکی سووریاوە دزەیان کردە ناو خاکی عێراق و شکستیان بە سوپا و هێزە ئەمنییەکانی عێراق لە پارێزگای نەینەوا هێنا و شاری مووسڵ و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.



چەکدارانی داعش رۆژی 3ـی ئابی 2014 هێرشیان کردە سەر شاری شنگال، کە شارێکی کوردستانییە و لە رووی ئیدارییەوە سەر بە پارێزگای نەینەوایە، دانیشتووانەکەی لە مەسیحی، کوردانی موسڵمان و زۆرینەی کوردانی ئێزدی پێکدێت.



هەروەک ئێزدییەکان رایدەگەیەنن، ئەو هێرش و کوشتوبڕەی کوردانی ئێزدییەکان، کوشتوبڕی ژمارە 73 بوو، کە بە درێژایی مێژوو بەسەر کوردانی ئێزدیدا هاتووە و ئەوان بە فەرمانی 73 ناوی دەنێن.



دوای داگیر کردنی شنگال لەلایەن داعشەوە، مەسعود بارزانی، سەرۆکی هەرێمی کوردستان فەرماندەی گشتیی هێزە چەکدارەکانی کوردستان بەڵێنی بە میر و هاووڵاتییانی کوردی ئێزدی و کوردستان بە گشتی دا، کە شاری شنگال رزگار دەکاتەوە و تۆڵەی شەهیدانی ئێزدی لەو رێکخراوە توندڕەوە دەکاتەوە.



رۆژی 13ـی تشرینی دووەمی 2015، دوای ئۆپەراسیۆنێکی دوو رۆژی بە بەشداریی حەوت هەزار و 500 پێشمەرگە، کە بەسەرپەرشتیی راستەوخۆی مەسعود بارزانی ئەنجامدرا، سەرۆکی هەرێمی کوردستان لە کۆنگرەیەکی رۆژنامەوانیدا لەسەر چیای شنگال، رزگار کردنەوەی شارەکەی راگەیاند.



دوای رزگار کردنەوەی شاری شنگال، میر تەحسین، میری ئێزدییانی کوردستان و جیھان لە راگەیەندراوێکدا، ئۆپەراسیۆنی ھێزەکانی پێشمەرگەی بە سەرپەرشتیی راستەوخۆی مەسعود بارزانی بە ”رۆژێکی مێژوویی“ ناساند و رایگەیاند، ”ئازادکردنەوەی شنگال خۆشی و شادی خستە دڵی ھەموو ئێزدییەکان، کوردستانییان و ھەموو مرۆڤایەتی“.



ئێزدییەکان، بەشێکن لە نەتەوەی کورد و لە هەرسێ بەشی کوردستانی باشوور، باکوور و رۆژئاوا نیشتەجێن. بنکەی سەرەکیی ئایینەکەشیان، کە ئاینێکی کوردییە، لە پارێزگای دهۆکە لە کوردستانی باشوور.
PAYAMNER-