پارێزگاری نەینەوا لە کۆنگرەیەکی رۆژنامەوانیدا لەبارەی پرسی ئاوارەکانەوە سوپاسی سەرۆکی هەرێمی کوردستان دەکات.

رۆژی چوارشەممە 2ـی تشرینی دووەمی 2016، نەوفەل حەمادی، پارێزگاری نەینەوا و فەرهاد ئەتروشی، پارێزگاری دهۆک کۆبوونەوە و تاوتوێی پرسی ئاوارەکانی پارێزگای نەینەوایان کرد.

دوای کۆبوونەوەکە، نەوفەل حەمادی لە کۆنگرەیەکی رۆژنامەوانیدا رایگەیاند، کە داوایان لە فەرهاد ئەتروشی و نەوزاد هادی، پارێزگاری هەولێر کردووە دوای رزگارکردنەوە و ئاوەدانکردنەوەی ناوچە داگیرکراوەکانی مووسڵ، بە هەماهەنگیی ئەنجومەنی پارێزگای نەینەوا ئاوارەکانی نەینەوا بگەڕێننەوە ناوچەکانیان.

پارێزگاری نەینەوا هاوکات داوای لە هەردوو پارێزگاری هەولێر و دهۆک کرد، کە تاوەکو رزگارکردنەوە و ئاوەدانکردنەوەی تەواوەتیی ناوچە داگیرکراوەکانی پارێزگاکەی ئاوارەکانی نەینەوا نەنێرنەوە ناوچەکانیان.

نەوفەل حەمادی بۆ لەخۆگرتنی ئاوارەکانی شاری مووسڵ و دەوروبەری لە پارێزگاکانی هەولێر و دهۆک لە کوردستانی باشوور، سوپاسی خەڵکی هەرێمی کوردستان و ”بەتایبەت “ مەسعود بارزانی، سەرۆکی هەرێمی کوردستانی کرد.

پارێزگاری نەینەوا بە پێویستی زانی پۆلیسی عێراقی لە ناوچە رزگارکراوەکانی حەمدانییە، بەرتللە، تلکێف و ناوچە رزگارکراوەکانی دیکەی پارێزگاکە خۆی بۆ پێشوازیکردن لە ئاوارەکان ئامادە بکەن و ژیانیان بۆپارێزن.

بەرپرسانی باڵای حکوومەتی هەرێمی کوردستان رایدەگەیەنن, بەهۆی شەڕی تائیفیی و هێرشی رێکخراوی توندڕەوی داعش، زیاتر لە 1.5 ملیۆن هاووڵاتیی پارێزگاکانی باشوور و ناوەڕاستی عێراق بە تایبەت هاووڵاتییانی شاری مووسڵ و دەوروبەری، روویان لە هەرێمی کوردستان و ناوچەکانی ژێر دەسەڵاتی پێشمەرگە کردووە.

لە رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شاری مووسڵ و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار و چەند ناوچەیەکی باشووری کەرکووک لەلایەن چەکدارانی داعش داگیر کرا.




باسنیوز