بەڕێوەبەرایەتی ئاسایشی پارێزگای سلێمانی رایدەگەیێنێ ، لەبەر دۆخی ناسكی هەرێمی كوردستان، مۆڵەتی خۆپیشاندانیان بە هیچ رێكخراو، گرووپ و دەستەیەك نەداوە.

لە راگەیێندراوێكدا كە وێنەیەكی بۆ رووداو نێردراوە، ئاسایشی سلێمانی پاساوی نەدانی مۆڵەتی خۆپیشاندانی بەوە هێناوەتەوە "لەم دۆخەی ئێستا کە وڵاتەکەمانی پێدا تێپەڕدەبێت، پێشمەرگە قارەمانەکان لەبەرەی جەنگ و بەرگریدان لەخاک و نیشتمان و کەرامەتی میللەتەکەمان، رۆژانە خوێن لە جەستەی پێشمەرگە ئەچۆڕێ و (داعش) بۆ پارسەنگی شکستەکانی لەکەرکووک و لێرەو لەوێ هێرش دەکەن و پلانیان هەیە".

بڕیارە رۆژی سێشەممە 31-10-2016، مامۆستا و فەرمانبەرانی ناڕازای لە شاری سلێمانی خۆپیشاندان بكەن، ئاسایش روونیكردووەتەوە "ئەو رێکخراو، گرووپ و دەستانە زۆربەیان فەرمی نین و مۆڵەتی خۆپیشاندانیان نییە".

دەقی راگەیێندراوەكە:

دەزگای ئاسایشی هەرێمی کوردستان
بەڕێوەبەرایەتی ئاسایشی پارێزگای سلێمانی ژمارە : و/202
بەشی ڕاگەیاندن و پەیوەندیەکان ڕۆژ : 31 /10 / 2016
---------------------------------------

بۆ / کەناڵەکانی ڕاگەیاندنی بەڕێز
ب / ڕونکردنەوە

هەموو لایەک ئاگادارئەکەینەوە ، لەم دۆخەی ئێستادا کە وڵاتەکەمانی پێدا تێپەڕدەبێت ، کە پێشمەرگە قارەمانەکان لەبەرەی جەنگ و بەرگریدان لەخاک و نیشتمان و کەرامەتی میللەتەکەمان، ڕۆژانە خوێن لەجەستەی پێشمەرگە ئەچۆڕێ و ( داعش ) بۆ پارسەنگی شکستەکانی لەکەرکوک و لێرەو لەوێ هێرش دەکەن و پلانیان هەیە ، بۆیە مۆڵەتمان نەداوە لەم هەلو مەرجەی ئێستادا ، کە ئەو ڕێکخراوو گروپ و دەستانە زۆربەیان فەرمی نین و مۆڵەتی خۆپیشاندانیان نییە .
لەگەڵ رێزدا

ڕاگەیاندنی
بەڕێوەبەرایەتی ئاسایشی پارێزگای سلێمانی




رووداو