سه‌رۆكی هه‌رێمی كوردستان به‌بۆنه‌ی كۆچی دوایی شاعیر ناوداری كورد(مام هێدی) په‌یامێكی هاوخه‌می بۆ بنه‌ماڵه‌ی كۆچكردوو ده‌نێرێت.



له‌به‌شێكی په‌یامه‌كه‌ی مه‌سعود بارزانی سه‌رۆكی هه‌رێمی كوردستان كه‌ وێنه‌یه‌كی ده‌ست(باسنیوز) كه‌وتووه‌ هاتووه‌"هێدی نموونەی وەفا و دلسۆزی و نیشتمانپەروەری بوو. هیچ سنورێكی بۆ كوردایەتی و خەباتی نەتەوەیی نەدەناسی. هەر بۆیەش هەمیشە لە لایەن نیشتمانپەروەر و تێكۆشەرانەوە بە چاوی رێز و تەقدیرەوە چاوی لێدەكرا و یەكێكیش بوو لەو كەسایەتییانەی لای جەنابی بارزانی نەمر هەردەم جێی رێز و حورمەت بوو".

ئه‌مه‌ی خواره‌وه‌ ده‌قی په‌یامه‌كه‌ی سه‌رۆكی هه‌رێمی كوردستانه‌:-



بە ناوی خوای گەورە و میهرەبان

بۆ بنەماڵەی شاعیری گەورەی گەلەكەمان، خوالێخۆشبوو خالدی حسامی (مام هێدی)

بە داخ و پەژارەیەكی زۆرەوە هەواڵی كۆچی دوایی شاعیری گەورەو ناسراوی گەلەكەمان مامۆستا خالدی حسامی (مام هێدی)مان پێگەیشت. مام هێدی، شاعیرێكی گەورە و تێكۆشەر و شۆڕشگێڕێكی بەباوەڕ و بە هەڵوێست بوو. ژیانی خۆی لە پێناوی دۆزی رەوای گەلەكەی و سەركەوتنی خەباتی كوردایەتیدا بەسەر برد و لەو پێناوەشدا ئاوارەیی و ماندووییەكی زۆری چێشت.

هێدی نموونەی وەفا و دلسۆزی و نیشتمانپەروەری بوو. هیچ سنورێكی بۆ كوردایەتی و خەباتی نەتەوەیی نەدەناسی. هەر بۆیەش هەمیشە لە لایەن نیشتمانپەروەر و تێكۆشەرانەوە بە چاوی رێز و تەقدیرەوە چاوی لێدەكرا و یەكێكیش بوو لەو كەسایەتییانەی لای جەنابی بارزانی نەمر هەردەم جێی رێز و حورمەت بوو.

لە دەستدانی مام هێدی خەسارەتێكی مەزن بوو بۆ گەلەكەمان و ئەدەب و فەرهەنگی كوردەواری . لە پرسەی مام هێدی دا سەرەخۆشی لە خۆمان و بنەماڵە و كەسو كاری رەحمەتی و تەواوی ئەدیب و نوسەر و شاعیرانی كوردستان دەكەم و خۆمان بە خاوەن پرسە و بەشداری خەمتان دەزانین.

سڵاو له‌ گیانی پاكی مام هێدی و له‌ خودای مه‌زن داواكارین جێگه‌ی به‌هه‌شتی به‌رین بێت و سه‌بر و ئارامی به‌ هه‌موو لایه‌ك ببه‌خشێت.

انا لله و انا الیه‌ راجعون

مەسعود بارزانی

29-10-2016