بەپێى زانیاریی میدیاکانی پارتی ژیانی ئازادیی کوردستان (پژاک) لە چەند ڕۆژى ڕابردوودا پێنجەمین کۆنگرەى ئاسایى خۆى بەڕێوە بردووە و لە کۆنگرەکەیاندا ژمارەیەک گۆڕانکاریی ئەنجام داوە.

بەرجاوترین گۆڕانکاری لە پێنجەمین کۆنگرەدا، عەبدووڕەحمان حاجى ئەحمەدى هاوسەرۆکى پەژاک گۆڕدراوە و سیامەند موعینى، کوڕی سولێمان موعینی جێگای گرتووەتەوە.

زیلان ئورمیەش بۆ هاوسەرۆکی هەڵبژێردراوە و ژمارەیەکى تری لە کادیرانى ئەو پارته‌، لەو کۆنگرەیەدا بۆ دەستەى بەڕێوەبەرایەتى و ئەنجوومەنى ناوەندی هەڵبژێردراون.

پارتی ژیانی ئازادیی کوردستان كه‌ خۆی به‌ ناوی پژاك پێناسه‌ ده‌كات، لەژێر کاریەگەریی بیر و ئەندێشەی پارتی کرێکارانی کوردستان و عەبدوڵڵا ئۆجەلان سەرۆکی زیندانی کراوی پەکەکە و لە کوردستانی ڕۆژهەڵات خەبات دەکات.

بە گوێرەی لێدوانی ڕێبەران و کادرە باڵاکانی ئەو حزبە، ئێستا هیچ گەڵاڵەیەکیان بۆ شەڕی چەکداری لەگەڵ ڕژیمی ئێران لە بەرنامەی کارەکانیاندا نییە.

لە ئەنجامنامەی کۆتایی کۆنگرەکەدا هاتووە "پژاک هەموو بوارەکانی خەباتی خۆی لە چوارچێوەی ئەندیشە و عەمەڵی شۆڕشگێڕی "هێڵی سێهەم" بە بنەما وەردەگرێ و وەک سەرەکیترین ئامانجە ئیستراتێژیکەکانی خۆی پەرەی پێدەدا و پێکیان دێنێت. لەسەر ئەم بنەمایە نە دەبێتە بەشێک لە سیاسەتەکانی پەرگالی جیهانی و نە لەپێناو ئامانجەکانی دەوڵەت-نەتەوەکانی ناوچەیی هەڵسوکەوت دەکات. هێڵی سێهەم، رێبازی خەبات بۆ پێکهاتنی نەتەوەی دیموکراتیک لە سەر بنەمای پارادایمی کۆمەڵگای ئەخلاقی-سیاسی لە ئێران و رۆژهەڵاتی کوردستانە."

پژاک خۆی لە چوارچێوەی پێناسەی "حیزبێکی تەنیا کوردستانی" ناهێڵێتەوە و لەسەر بنەمای سیاستی دیموکراتیک، یەکێتی و هاوپەیمانی لەگەڵ هێز و گەلانیتری ئێران وەک فارس، ئازەری، عەرەب، بەلوچ، مازەنی و … وەک سەرەکیترین بەرنامە سیاسیەکان بۆ دیموکراتیزە کردنی ئێران ناوزەد دەکات. لەسەر بنەمای ئەم خوێندنەوەیە کە شۆڕشی کۆمەڵایەتی لە ئێران بەبێ هاوپەیمانی لەگەڵ هێزی گۆڕانخواز و دیموکراتیکەکان مسۆگەر نابێت، پژاک تێکۆشان و خەبات بۆ مسۆگەر بوونی یەکگرتنەوەی تەواوی ئەم هێزانە لەژێر ناوی "بەرەی دیموکراتیکی گەلانی ئێران" بە پێویست و زەرور دەزانێ."

لەپێناو وەدی هاتنی دیموکراتیزاسیۆنی ئێران، کوردستان وەک دڵی گۆڕانخوازی و سەرچاوەی هەڵقولانی سیاسی لە ئێران پێناسە دەکرێ، ئێستاکە رەخساوترین زەمینەی هاوپەیمانی هێزە سیاسی و کۆمەڵایەتی کوردستانییە. لەسەر ئەم بنەمایە پژاک هەموو هێزە سیاسی و کۆمەڵایەتیەکانی رۆژهەڵاتی کوردستان بانگهێشتی دروستکردنی "بەرەی دیموکراتیکی هێزەکای رۆژهەڵاتی کوردستان" دەکات و بۆ وەدی هاتی ئەمەش، پژاک بە پێویست دەزانێ تێکۆشان خۆی بەرفراوانتر و پێشەنگایەتی بکات."

پارتی ژیانی ئازادی كوردستان کە ساڵی ٢٠٠٤ لەلایان هەندێک لە خوێندکارانی تەڤگەری ئازادی کوردستان دامەزراو لە ماوەی ١٢ ساڵ خەبات و چالاکی خۆی بەردەوام هەوڵیداوە کێشەی کورد لە ئیران بە زمانێکی سیاسی و دیموکراتیک چارەسەر بکات؛ بەڵام دەوڵەتی ئیران هەرکات وەڵامی داخوازیەکانی بە هێرش و گرتن و سێدارە داوەتەوە.












باسنيوز